„ჰენდი“ პირველი ქართული ბრენდია, რომელიც მომხმარებელს მაჯის ხის საათებს სთავაზობს,  თვის ბოლოს ლესელიძის ქუჩაზე „ჰენდის“ აქსესუარების მაღაზია იხსნება.  ბრენდი ქართულ ბაზარზე 3 წელია არსებობს,  რომელმაც პირველი 2 საათი საკუთარი ფინანსებით 300 ლარის ინვესტიციით დაამზადა. იდეის ავტორებმა  26 წლის სოფო გურასაშვილსა და ნიკა გიგაიამ პირველი მოდელები ინოვაციებისა და ტექნოლოგიების სააგენტოს გამოფენაზე წარადგინეს, რასაც დიდი დაინტერესება მოჰყვა და მალევე ბიზნესის სახე მიეცა.  

სოფო გურასაშვილი „კომერსანტთან“ ინტერვიუში ამბობს, რომ ბრენდის პირველი მაღაზია ტურისტულად აქტიურ ტერიტორიაზე გაიხსნება, რადგან როგორც აღმოჩნდა ხის მაჯის საათებმა უცხოელ მომხმარებლებში დიდი დაინტერესება გამოიწვია.

„ახლა ჩვენი სახელოსნო გვაქვს თბილისში, შევიძინეთ დანადგარები, გვყავს ორი მესაათე, ორი მკერავი და დიზაინერი - ჩემი მეუღლე,  ნიკა გიგაია. ყველა საათი ჩვენი დიზაინითაა შექმნილი. პროდუქცია დიდ შრომას მოითხოვს, თუმცა ფასები ქართულ ბაზარს მაქსიმალურად მოვარგეთ და მათი შეძენა ონლაინაა შესაძლებელი, ამასთანავე ვაგზავნით უცხოეთშიც შეკვეთებს. მაღაზია ლესელიძეზე თითქმის დასრულებულია და საწყის ეტაპზე 30-ამდე მოდელი გაიყიდება. მაქსიმალურად გვინდა ხარისხის დახვეწა, რომ უცხური ბაზარი დავაკმაყოფილოთ.“ – „ჰენდის“ დამფუძნებელი.

საათების დასამზადებლად კომპანია სხვადასხვა სახეობის ხეს იყენებს - კაკალი, ბზა,  წიფელი და შავი ხე. ასევე იტალიური ტექნოლოგიით დამზადებული თურქული ტყავი. საერთო ჯამში პროდუქციის დასამზადებლად საჭირო დანადგარები და რესურსი ახლა უკვე  30 000 ლარის ღირებულებისაა.

„3 წლის წინ გვქონდა მხოლოდ იდეა, არ ვიცოდით როგორ დაგვემზადებინა ხის საათები, განვიცდიდით ინფორმაციის ნაკლებობას. ხოლო ადამიანები ვინც ამ სფეროში მოღვაწობდნენ არ აღმოჩნდნენ საკმარისად კომპეტენტურები ან გახსნილები ინფორმაციის გასაზიარებლად.  დავიწყეთ ყველაფრის დამოუკიდებლად სწავლა,  ვიდეოებს ვუყურებდით და ვსწვალობით - ეს იყო ყველაზე რთულად გადასალახი ეტაპი. ინოვაციების და ტექნოლოგიების სააგენტოსთან მჭიდროდ ვთანამშრომლობდით და ხშირად გვიწვევდნენ ღონისძიებებზე, რომ გამოგვეჩინა ჩვენი პროდუქცია.“ - აღნიშნა სოფო გურასაულმა.

სამომავლოდ „ჰენდი“-ს დაემატება სხვადასხვა აქსესუარებიც, როგორც დამფუძნებლები ამბობენ აქცენტი კვლავაც ხეზე იქნება , ხოლო არჩევანი უფრო დიდი.

კომერსანტი