„Wizzair“, „Ryanair“ და „Eurowings“-ის შემდეგ ქართულ ავიაბაზარზე ახალი დაბალბიუჯეტიან კომპანიას „Air Georgia express“-ს უნდა დაეწყო ოპერირება, თბილისის აეროპორტში AIRBUS A320 ტიპის თვითმფრინავიც უნდა შესულიყო თუმცა, ქართულ დაბალბიუჯეტიანი ავიაკომპანიის პროექტი ამ დრომდე ვერ განხორციელდა. „Air Georgia“-ს დამფუძნებელი გიორგი კოდუა ამბობს, რომ პროექტი ამ ეტაპზე გაჩერდა. მისი თქმით, ეკონომიკის სამინისტროს პირველი ქართულ დაბალბიუჯეტიანი ავიაკომპანიის პროექტი მოსწონს, თუმცა ბიზნესმენი ოპერირების პირობებზე სახელმწიფოსთან ვერ თანხმდება, უფრო სწორად ბოლო ერთი წელია, კოდუამ ვერ იპოვა პირი, ვისთანაც ხელშეკრულების დეტალებს შეათანხმებდა:

„პროექტი თავდაპირველად მაშინდელი ეკონომიკის მინისტრის მოადგილესთან აკაკი საღირაშვილთან გავიარე. სახელმწიფოს მხრიდან იყო მზაობა იმის, რომ „Air Georgia express“-ს უნდა დაეწყო ოპერირება. შემდეგ აკაკი საღირაშვილი იუსტიციის მინისტრის მოადგილედ დაინიშნა. მინისტრის ახალ მოადგილესთან კი პროექტის განხილვა გაჭიანურდა, შემდეგ მასაც ჩამოართვეს პროექტი და მარიამ ქვრივიშვილთან გადავიდა, ბოლოს გვითხრეს, რომ ირაკლი ღარიბაშვილს ახალი სტრატეგია აქვს - მოკლედ, ძალიან დიდი დაბნეულობაა. რასაც მეუბნებიან, იმასთან დაკავშირებით პრეტენზია არ მაქვს, მაგრამ ამას შესაბამისი ქმედებები არ მოჰყვება. შესაბამისად, პროექტი გაჩერდა, მე დამოუკიდებლად არ გავაკეთებ იმას, რაც პრობლემებში შემიყვანს. მეუბნებიან, რომ პროექტს განვახორციელებთ, შემდეგ კი პროცესი იწელება, ხელშეკრულებას არ მიწერენ. ამბობენ, რომ პროექტი მოსწონთ, შემდეგ კი არაფერი კეთდება“, - აცხადებს გიორგი კოდუა.

შეგახსენებთ, რომ პირველი ქართული დაბალბიუჯეტიანი ავიაკომპანიის ოპერირების დაწყების შესახებ ინფორმაცია გასულ წელს გავრცელდა. მაშინ ,,ჰაბ ჯორჯიას“ დამფუძნებელი გიორგი კოდუა „კომერსანტს“ უყვებოდა, რომ პროექტი ბრიტანული და არაბული ინვესტიციით უნდა განხორციელებულიყო.  „Air georgia“ ფრენებს  გერმანიის, იტალიის, საბერძნეთისა და უკრაინის მიმართულებით გეგმავდა, წლის განმავლობაში კი კომპანია 100 000 მგზავრს უნდა მომსახურებოდა.