ქვევრის ლუდის გამოჩენამ არამარტო ქართულ, არამედ საერთაშორისო ბაზარზე დიდი დაინტერესება გამოიწვია. როგორია დამზადების ტექნოლოგია, როგორ ხვდება ლუდი ქვევრში, რამდენად მაღალია მომხმარებლების დაინტერესება და რა პოზიცია უჭირავს ქვევრის ლუდს საერთაშორისო ბაზარზე – ამ დეტალების გასარკვევად „კომერსანტი“ მწარმოებელი კომპანიის Gotsa Wines-ის მფლობელს ბექა გოცაძეს დაუკავშირდა.

„როგორც მეღვინეობაში მთავარი არის ყურძენი და ვენახი, ისე ლუდში მთავარია ალაოდა ინგრედიენტები ისეთი როგორიც მაგალითად სვიაა. მე თავად მომყავს ქერიდან სვია, შემდგომ ქერს ვაღვივებ, ვქმნი ალაოს, რომელსაც თავისი გარკვეული ტექნოლოგიური პროცესები მოჰყვება. მნიშვნელოვანია, რომ ალაომ თავისი არომატული თვისებები არ დაკარგოს. მეორე ეტაპი ალაოს გამოცხობა-მოხალვაა, რომელსაც ლუდის მოხარშვის პროცედურა მოსდევს. შემდეგ ხდება ამ ლუდის ფერმენტაცია. როცა ალაოს ქმნი ქერის მარცვალში სახამებელი წარმოიქმნება, ეს ბუნებრივი ქიმიური პროცესია.მანამდე ქერის მარცვალს შაქარები ნაკლებად აქვს. ეს განაპირობების ლუდში ალკოჰოლის მცირე შემცველობას“, — განმარტავს ბექა გოცაძე.

როგორც „კომერსანტს“ ბექა გოცაძემ უთხრა, რომ ლუდის წარმოებისას მნიშვნელივანი როლი საფუარის ბაქტერიას აქვს, რადგან გემოების განმაპირობებელია.

„როგორი საფუარიც გაქვს ისეთი გემო ექნება პროდუქტს. რადგან მე მეღვინე ვარ ლუდის ფერმენტაციისას ჩემი ცქრიალა ღვინოების ლექს ვიყენებ საფუვრად და გამოდის რომ ქერის მოყვანიდან ლუდის ფერმანტაციის ჩათვლით პროცესი მთლიანად ბუნებრივია.ასევე, ნახარშში ყურძნის წვენს ვურევ. ამიტომ ქვია ჩემს ლუდს „ყურძნის ლუდი“. საბოლოოდ, ფერმენტაციას, ანუ დუღილის პროცესს და ასევე თუ სურვილი მაქვს დაძველების პროცესსაც ლუდი ქვევრში გადის, რის შემდგომაც ისხმევა ბოთლში, ამთავრებს დუღილს და წარმოქმნის თავისებურ გაზს. ეს არის Artisan Brewery, რომელიც საოჯახო, ხელით ნაკეთს ნიშნავს. ქერის მოყვანიდან ალაოდ გარდაქმნამდე და ხარშვიდან ფერმენტაციამდე ყველაფერი ჩვენს ხელში გადის. ლუდის შემთხვევაში ქვევრი არის ჭურჭელი, რომელიც უჟანგავი ფოლადის ავზების ნაცვლად გამოიყენება. ავზები ძალიან ძვირი ღირს, ამიტომ ქვევრს ვიყენებ, რომელიც მარტივია გამოსაყენებლად, ტემპერატურული რეჟიმიც დაცულია და სითბო-სიგრილესაც კარგად ინარჩუნებს“, - აცხადებს Gotsa Wines-ის მფლობელი.

კომპანიას უკვე 2 წელია რაც ექსპორტზე ქვევრის ლუდი გააქვს და განსაკუთრებული დაინტერესება ამერიკის შეერთებული შტატების მხრიდან წამოვიდა.

„ახალი პროდუქტი ყოველთვის მიმზიდველია, შესაბამისად საქართველოშიც თანდათანობით დაინტერესება იზრდება და გაყიდვების მაჩვენებელიც მატულობს. თუმცა, ეს ლუდი თავიდანვე ექსპორტისთვის შეიქმნა. ორი წელია რაც ამერიკასა და იაპონიაში გაგვაქვს და დიდი გამოხმაურება მოჰყვა. განსაკუთრებული ინტერესი ამერიკიდან წამოვიდა“,- აღნიშნავს მეღვინე.

Gotsa Wines-ი ოჯახური ბიზნესია და მეღვინეობის დიდი ისტორია აქვს. ძველი, ტრადიციული მეთოდებით დამზადებულ ღვინის ფართო ასორტიმენტს ახლა ქვევრის ლუდის წარმოებაც დაემატა და საერთაშორისო ბაზარზე კიდევ ერთი ახალი ქართული პროდუქტი გამოჩნდა.

ანი ცარციძე