სვანეთი HIGHLANDER GEORGIA-სთვის ემზადება. „HIGHLANDER Adventure” გრძელ დისტანციაზე ლაშქრობის გლობალური პროექტია, რომელიც მსოფლიოს სხვადასხვა ქვეყანაში იმართება. პროექტი წელს პირველად საქართველოში, სვანეთში განხორციელდება. ლაშქრობა 25-27 აგვისტოს ბეჩოდან უშგულამდე გაიმართება. ღონისძიებაში ასობით ადგილობრივი და უცხოელი მოლაშქრე მიიღებს მონაწილეობას.

ტურიზმის ეროვნულმა ადმინისტრაციამ, სალაშქრო პროექტი „HIGHLANDER სვანეთი, საქართველო“, სათავგადასავლო ტურიზმზე მომუშავე შიდა და შემომყვან ტურისტულ კომპანიებს გააცნო. 

„ტურიზმის ეროვნული ადმინისტრაცია მხარს უჭერს HIGHLANDER GEORGIA-ს გამართვას. მნიშვნელოვანია მსგავსი მასშტაბური პროექტების განხორციელება საქართველოში. ეს პროექტი საშუალებას აძლევს სათავგადასავლო ტურიზმის მიმდევრებს, რომ გაიგონ მეტი საქართველოს შესახებ, გამოცადონ თავიანთი შესაძლებლობები, როგორც ლაშქრობის ასევე სხვადასხვა სათავგადასავლო მიმართულებებით. ეს ტურისტული კომპანიებისთვის დამატებითი საშუალებაა, უფრო მრავალფეროვანი გახადონ თავიანთი პროდუქტები და შესთავაზონ ტურისტულ ბაზარს“, — განაცხადა ტურიზმის ეროვნული ადმინისტრაციის შიდა ტურიზმის სტიმულირების სამმართველოს უფროსმა ეკატერინე ყოლბაიამ.

HIGHLANDER GEORGIA-ს მენეჯერი თევდორე მაყაშვილს იმედია აქვს, სათავგადასავლო ტურიზმის კომპანიები დაინტერესდებიან თანამშრომლობით, რაც შეიძლება მეტ უცხოელ ტურისტს მიაწვდიან ინფორმაციას და 25-27 აგვისტოს ძალიან ბევრი უცხოელი მოლაშქრე იქნებ სვანეთში.

„HIGHLANDER GEORGIA” ხორციელდება ევროკავშირის, შვედეთისა და ავსტრიის ხელშეწყობით, პროექტ GRETA-ს ფარგლებში. პროექტის პარტნიორები არიან: საქართველოს ტურიზმის ეროვნული ადმინისტრაცია, თბს ბანკი, მესტიის მუნიციპალიტეტის მერია და სვანეთის ადგილის მართვის ორგანიზაცია, „შან-ლენდი“ (დაფუძნებული ევროკავშირის, შვედეთისა და ავსტრიის ხელშეწყობით, პროექტ GRETA-ს ფარგლებში). სოციალური მედია პარტნიორია „გაატარე 4 სეზონი საქართველოში“.