როდესაც COVID-19-ის პანდემიამ პირბადე ჩვენი ყოველდღიურობის ნაწილად აქცია, იაპონური სტარტაპი Donut Robotics ახალ შესაძლებლობებზე დაფიქრდა. მაშინ, როცა სხვადასხვა კომპანია სხვადასხვა დიზაინისა და ფუნქციის მქონე პირბადეს გვთავაზობს, მათ მაღალტექნოლოგიური ნიღბის შექმნა გადაწყვიტეს, რომელიც სოციალური დისტანცირებისას კომუნიკაციას უფრო მარტივს გახდიდა. ასე შეიქმნა C-Face – ჭკვიანი ნიღაბი, რომელიც კორონავირუსისგან დაცვას არ გვთავაზობს, თუმცა, იწერს მფლობელის ხმას და თანამოსაუბრეს 8 სხვადასხვა ენაზე უთარგმნის მას.
C-Face შექმნილია თეთრი პლასტმასასა და სილიკონისგან. მასზე მიმაგრებულია მიკროფონი, რომელიც თანამოსაუბრის სმარტფონს ბლუთუზის დახმარებით, 10 მეტრის რადიუსში უკავშირდება. სისტემას შეუძლია საუბარი იაპონურიდან ჩინურში, კორეულში, ვიეტნამურში, ინდონეზიურში, ინგლისურში, ესპანურსა და ფრანგულში თარგმნოს. ის ადამიანი, რომელთანაც კომუნიკაცია გსურთ და რომლის სმარტფონსაც თქვენი ნიღაბი უკავშირდება, თქვენს საუბარს სპეციალურ აპლიკაციაში, სასურველ ენაზე აკრეფილი ტექსტის სახით მიიღებს. ხოლო იმისათვის, რომ საუბარი ორმხრივად შედგეს, მასაც უნდა ეკეთოს C-Face, რომელიც თქვენს სმარტფონს დაუკავშირდება.
აღსანიშნავია, რომ მთარგმნელი პროგრამა Donut Robotics-მა ჯერ კიდევ პანდემიამდე შექმნა და ის რობოტ Cinnamon-ში ჰქონდა ინტეგრირებული. კორონავირუსმა ეს უკანასკნელი პროექტი შეაყოვნა, თუმცა, სტარტაპმა სისტემის გამოყენება სხვა კუთხით – C-Face-ის შესაქმნელად შეძლო.
როგორც უკვე ვთქვით, ნიღაბი სილიკონისა და პლასტმასასგანაა დამზადებული, შესაბამისად, სუნთვის უზრუნველსაყოფად მასზე მცირე ზომის ნახვრეტებია დატანილი. მიუხედავად იმისა, რომ ნიღაბი კომუნიკაციის ახალი სტილით სოციალური დისტანცირების დაცვას უწყობს ხელს, ნახვრეტების გამო, ის მაინც ვერ დაიცავს ორგანიზმს ვირუსის შეღწევისგან. აქედან გამომდინარე, გამომგონებლები იძლევიან რეკომენდაციას, მომხმარებელმა C-Face-ის ქვეშ ჩვეულებრივი ნიღაბი ატაროს.
CNN-ის ინფორმაციით, C-Face-ის პირველი პარტია (5000-დან 10000 ნიღბამდე) იაპონიაში, დეკემბრისთვის იქნება ხელმისაწვდომი, მათი ფასი კი 40-დან 50 დოლარამდე იმერყევებს, რასაც აპლიკაციის საფასური დაემატება. Donut Robotics ფართო გაყიდვების დაწყებას 2021 წლის აპრილამდე არ გეგმავს, თუმცა, დიდი დაინტერესებიდან გამომდინარე, C-Face შეიძლება ის Kickstarter-ის პროექტის სახით ვიხილოთ და წინასწარი შეკვეთა სწორედ ამ გზით შევძლოთ. C-Face-ის გამოყენება შეიძლება ეფექტური იყოს აეროპორტებში, ბანკებსა თუ სხვადასხვა სერვისის გამწევ დაწესებულებებში.
Marketer