აშშ და ვაშინგტონის მოკავშირეები ნატო-ს ხაზით შავ ზღვაზე ისე იმოქმედებენ, როგორ საჭიროდ ჩათვლიან. ამის შესახებ ოთხშაბათს, 10 ნოემბერს, პენტაგონის ოფიციალურმა წარმომადგენელმა ჯონ კირბიმ განაცხადა.
„ოპერაციებს ვატარებთ ნატოს პარტნიორებთან ერთად და, რა თქმა უნდა, ცალმხრივადაც. თქვენ ეს დაინახეთ. ჩვენ გავაგრძელებთ ფრენას და ცურვას საერთაშორისო საჰაერო და საზღვაო სივრცეებში, როგორც ამას საჭიროდ ჩავთვლით“, - განაცხადეს აშშ-ის თავდაცვის უწყებაში. კირბიმ ხაზი გაუსვა, რომ შავ ზღვაში დღესაც იმყოფებიან ამერიკული ხომალდები. 1ვფიქრობ, ეს მნიშვნელოვანი პრინციპია, რომელიც უნდა დავიცვათ“, - განაცხადა მან.
შავ ზღვაში ფრთოსანი რაკეტებით შეიარაღებული ამერიკული ხომალდი USS Porter 30 ოქტომბერს შევიდა. მას 4 ნოემბერს USS Mount Whitney და მომმარაგებელი გემი USNS John Lenthall შეუერთდნენ. რუსი სამხედროები აკვირდებიან მათ და არ უნდა დაუშვან პროვოკაციები, განაცხადა რუსეთის თავდაცვის მინისტრმა სერგეი შოიგუმ.
ვაშინგტონის ქმედებებს მან „მოსინჯვა“ უწოდა, თუ როგორ აქვს მოწყობილი რუსეთს მთელი სისტემა შავიზღვისპირეთსა და ქვეყნის სამხრეთში. „როდესაც შავ ზღვაში შემოდის არა რეგიონული სახელმწიფოს ხომალდი, როდესაც ვიცით, რომ ის აღჭურვილია მაღალი სიზუსტის დიდი სიშორის შეიარაღებით, როდესაც გვესმის, რომ ეს იარაღი მის ბორტზეა და ის სასეირნოდ არ მიდის, ბუნებრივია, ჩვენ ვაკვირდებით მას და გვესმის, რომ ნებისმიერ მომენტშია მოსალოდნელი პროვოკაცია, როგორც ეს ბრიტანულ ხომალდთან დაკავშირებით მოხდა არცთუ დიდი ხნის წინ. რა თქმა უნდა, ჩვენ უნდა დავუშვათ ასეთი სცენარები“, - განაცხადა შოიგუმ.
ცნობისთვის, USS Porter და USS Mount Whitney 8 ნოემბერს ბათუმის აკვატორიაში შევიდნენ, სადაც მათ საზეიმო მიღება მოუწყეს.