„საქართველოში  იახტების გაყიდვაში პარადოქსული მაჩვენებელი დაფიქსირდა, პანდემიის პერიოდში ქვეყანაში 6 იახტა გაიყიდა“ - ამის შესახებ „კომერსანტს“ იახტების მშენებელი უმსხვილესი კომპანია Azimut-Benetti Group-ის წარმომადგენელმა საქართველოში, Azimut Georgia-ს დირექტორმა გიორგი ჩიკვაიძემ განუცხადა.

იტალიური Azimut-Benetti Group-ი უკვე მეოთხე წელია მსოფლიოში ნომერ პირველი მეგა-იახტების მშენებელი კომპანიის სტატუსს ინარჩუნებს. საქართველოში Azimut-ის წარმომადგენლობა 2017 წლიდან ოპერირებს, შეთავაზებული იახტები კი მოიცავს ისეთ  მოდელებს, როგორებიცაა Flybridge, Atlantis, S-collection, Magellano, Grande.

საქართველოში იახტების მიმართულება და ინტერესი პანდემიის პერიოდში განსაკუთრებით გაიზარდა. როგორც Azimut Georgia-ში განმარტავენ, ქვეყანაში გაყიდული იახტების ფასი 45 000-დან მილიონ დოლარამდე მერყეობს.

„სამ თვეში ექვსი იახტის გაყიდვა საქართველოსთვის ძალიან ბევრია. პროდუქტების ფასები ბრენდების მიხედვით 45 000 დოლარიდან იწყება და  რამდენიმე მილიონამდე ადის.  ჩვენთან საშუალო ფასიანი მოდელები გაიყიდა.  უნდა აღინიშნოს, რომ ჩვენი კანონმდებლობა ამ კუთხით, არის უნიკალური. საქართველოს გარეთ , ევროპის ტერიტორიაზე არსად ასეთი კანონმდებლობა არ არის, რომ საიახტო ბიზნესი თავისუფლდებოდეს საბაჟო გადასახადისგან, რაც თავისთავად გვაძლევს საშუალებას, რომ ისეთი ფასი შევთავაზოთ მომხმარებელს, როგორიც სხვაგან არ არის. ამ სისტემამ 20 წლით წინ წასწია საიახტო საქმიანობა ქვეყანაში.

ბოლო პერიოდში იახტების მიმართ  ინტერესი არანორმალურად დიდია. ადრე თუ ორ ან სამ თვეში ერთხელ ერთი შეხვედრა გვქონდა დაინტერესებულ ადამიანებთან, წელს ეს მაჩვენებელი გაზრდილია. რასაც ვუკავშირებ ამ ტენდენციას არის ის, რომ ადამიანებმა ვინც ევროპაში ნახეს, თუ რა მნიშვნელოვანია საზღვაო ქალაქებში საიახტე ინდუსტრიის არსი, მათაც გაუჩნდათ იგივე ინტერესი.  მეორეს მხრივ,  ვფიქრობ, რომ Covid19 -ის გამო საზღვრების ჩაკეტვამ განაპირობა ის, რომ ადამიანებს კომფორტის ადგილზე მოწყობა უნდათ.  

რატომღაც, საიახტო ბიზნესი ასოცირდება რამდენიმე მილიონიან შენაძენებთან. რეალურად კი, 45-100 000 დოლარად შეიძლება ისეთი იახტა შეიძინოთ ჩვენი რეგიონისთვის, როგორებიც მონაკოში გვინახავს.  იახტების მოვლის გასაადვილებლად კი გარკვეული ინფრასტრუქტურაც მზადდება,“- განმარტავს გიორგი ჩიკვაიძე.

მომავალი წლისთვის Azimut Georgia კადრების გადამზადებისთვის სერვის ცენტრის გახსნას გეგმავს, სადაც მოხდება კაპიტნების აკრედიტაცია, რადგან, როგორც კომპანიაში გამარტავენ, ახალგაზრდების მხრიდან ამ სფეროში დასაქმების მსურველი ძალიან ბევრია. 

Azimut-Benetti Group-ი  იახტინგის სექტორში უდიდესი კერძო ჯგუფია, რომელიც 40 წელიწადზე მეტია ოპერირებს და აწარმოებს პროდუქციას 6 გემთსაშენზე, მათ  წარმოებაში კი 40 ზე მეტი მოდელია.

კომპანიაში აქციების უდიდესი პაკეტის მფლობელი ბოლო 40 წელია კომპანიის დამფუძნებელი პაოლო ვიტელია. Azimut-Benetti Group-იის ისტორია კი 1969 წლიდან  იწყება, როცა პაოლო ვიტელიმ იახტების დაქირავებისა და ფრანგული სანაპიროების შესწავლის შემდეგ მეგობართან ერთად ტუნისში კომპანია დააარსა.

მარიამ მორგოშია