პანკისის ხეობაში, სოფელ ჯოყოლოში, სადაც 200 კომლი ცხოვრობს 15 სტუმარზე გათვლილი „ნაზის საოჯახო სასტუმრო“, ან როგორც მას საერთაშორისო დამსვენებლები იცნობენ - Nazy’s Guest House-ი ყოველწლიურად უცხოელი ტურისტებით გადატვირთულია. როგორც სასტუმროს მეპატრონე ნაზი დაქიშვილი „კომერსანტთან“ ინტერვიუში აცხადებს, ხეობის ტურისტული პოტენციალი უცხოელებისთვის მიმზიდველია, თუმცა სახელმწიფოს მხრიდან ხეობის პოპულარიზაციით შეიძლება საქართველოს ახალი „დამალული ტურისტული მარგალიტი“ შეემატოს.
ნაზის საოჯახო სასტუმრო, რომელიც 2013 წელს დაარსდა, როგორც საქმიანი ტურიზმისთვის, ასევე სათავგადასავლო და დასვენების მოყვარულებისთვის სივრცეებსა და სხვადასხვა აქტივობებს სთავაზობს სტუმრებს, თუმცა პანდემიის გამო 4 თვეა უცხოელი სტუმარი საოჯახო სასტუმროს არ ჰყოლია.
„ძირითადად უცხოელი დამსვენებლები გვყავს, ადგილობრივები ნაკლებად მოდიან ჩვენთან. მაგრამ, პანდემიის გამო, უკვე რამდენიმე თვეა შეჩერებულები ვართ. შიდა ტურიზმის კუთხით დავიწყეთ მასტერკლასების და გასტრონომიული ტურების შეთავაზება ადგილობრივებისთვის, როგორებიცაა ჩეჩნური სამზარეული, ფშავური, სვანური, თუშური კერძები, ჩვენ ვცდილობთ ამ მხარის უნიკალურობა ყველას გავაცნოთ.
წინა წლებში სასტუმრო მთლიანად დატვირთული იყო, ერთი დღეც კი არ ყოფილა ტურისტის გარეშე. პანდემიის შემდეგ, 17 ივნისს გავიხსენით, ვუმასპინძლეთ ქართველების ერთ ჯგუფს. რაც შეეხება სამომავლო ჯავშნებს, სექტემბრამდე უცხოელი ტურისტი არ გეგმავს ჩვენთან სტუმრობას, თუმცა იმედი აქვთ რომ საქართველოში მალე იმოგზაურებენ,“— განმარტავს ნაზი დაქიშვილი.
რა პოტენციალი აქვს პანკისის ხეობას ტურისტული მიმართულებით? ხდება თუ არა ამ ადგილის საკმარისად პოპულარიზება და რით განსხვავდება სხვა ტურისტული მიმართულებებისგან, რაც საქართველოში ასეთი აქტუალურია? ნაზი დაქიშვილი მიიჩნევს, რომ პანკისი, საჭიროებს როგორც ინფრასტრუქტულად ხელშეწყობას, ასევე აქტიურ მარკეტინგულ კამპანიას, ამჟამად კი უცხოელების ინტერესი თავად სასტუმროს აქტიურობითაა მიღწეული.
ბაწარას ნაკრძალი, უძველესი სათვალთვალო კოშკები, ეკლესიები, წმინდა ადგილები, უთხოვარის ტყე - პანკისის ხეობაში ამ ტურისტული ადგილების პოპულარიზაციისა და ადგილობრივებისთვის შემოსავლის წყაროს შენარჩუნებისთვის ნაზი დაქიშვილი მიიჩნევს, რომ საჭიროა საინფორმაციო დაფების განთავსება და ინფრასტრუქტურის მოწყობა.
„პანკისი არის დამალული მარგალიტი, რომელსაც აქვს განვითარების ძალიან დიდი პოტენციალი. ტურისტული ინფრასტრუქტურის მოწესრიგება კარგი იქნებოდა, რადგან ადგილზე არ გვაქვს საინფორმაციო ცენტრი, მეტი მარკეტინგული ღონისძიებები რომ ჩატარდეს და ყველა გაეცნოს პანკისის განსხვავებულ კულტურასა და ტრადიციებს, ეს ხელს შეუწყობდა ტურიზმის განვითარებას.
საქართველოში ბევრი კომპანია დაზეპირებულ მარშუტებს სთავაზობს მომხმარებელს , ტურისტები კი ეძებენ გგანსხვავებულს, რაც აქამდე არ უნახავთ და ამბობენ, რომ პანკისი მათთვის არის უცხო სამყარო. სამწუხაროდ დღემდე არ არის მოხსნილი სტერეოტიპები ადგილობრივებში, და დღემდე ფიქრობენ, რომ პანკისში ჩამოსვლა არ არის უსაფრთხო. ეს ერთერთი ყველაზე უსაფრთხო რეგიონია. ქისტური თემი არის შეკრული, როგორც საერთო ოჯახი და როცა ტურისტი ჩამოდის მისი მიღება ხდება როგორც ქისტების სტუმრის და არა რომელიმე კონკრეტული სასტუმროს. ეს ფაქტორი ძალიან ძლიერია, ამის ჩვენება გვინდა ყველასთვის.
მნიშვნელოვანი ფაქტი, ამ ხეობის პოტენციალზე არის ბაწარას ეროვნული ნაკრძალი, რომელიც მთელს მსოფლიოშია ცნობილი უთხოვარის ფართო ტყით. მხოლოდ ამისთვისაც კი ჩამოდიან საქართველოში. თუმცა, აქ არ არის მოწყობილი ტურისტული ინფრასტრუქტურა და ტურისტების დაშვება შეზღუდულია - ამის მოგვარება არა მარტო ხეობის ეკონომიკურ სტაბილურობას, არამედ საქართველოს ტურისტულ იმიჯს შეუწყობდა ხელს. აქვე არის მეცხრე საუკუნის ძველი სათვალთვლო კოშკი , ეკლესიები, წმინდა ადგილები, კარგი იქნებოდა ამათი ტურისტულად კარგად შეფუთვა, საინფორმაციო დაფების განთავსება.
ტურიზმი და საოჯახო სასტუმროები ბევრი ოჯახისთვის ერთერთი შემოსავლის წყაროა. სხვა განვითარების ალტერნატივა არ არის ხეობაში,“- აღნიშნავს სასტუმროს მეპატრონე.
ხეობაში ხელმისაწვდომი აქტივობები გათვლილია როგორც აქტიური ასევე მშვიდი დასვენების მოყვარულებისთვის. როგორც სასტუმროს მეპატრონე განმარტავს. კვებისა და ღამის თევის გარდა დამსვენებელს შეუძლია ისარგებლოს საცხენოსნო ტურებით, კულტურულ ტურებით, გასტრონომიული ტურებით, კულინარიის მასტერკლასებით, ველოტურებით, სამთო და საფეხმავლო ტურებით. სასტუმროში არის 35 ადამიანზე გათვლილი საკონფერენციო დარბაზი, სადაც ყოველწლიურად სხვადასხვა საქმიანი შეხვედრები ტარდება.
მარიამ მორგოშია