გლობალური პრობლემების მიუხედავად, ამ ეტაპზე საქართველოში პანიკის საფუძველს ვერ ხედავენ ქართველი იმპორტიორები და აცხადებენ, რომ საკვებ პროდუქტსა და ჰიგიენის საშუალებებზე დეფიციტი და ფასის ზრდა მოსალოდნელი არ არის.

სასურსათო მარაგებზე ისაუბრა საქართველოს პრემიერ მისიტრმა გიორგი გახარიამ, მისი თქმით ქვეყანაში დღეს მარაგი არსებობს,  არ არის დეფიციტის საფუძველი. პრემიერი აცხადებს, რომ მთავრობა ყოველდღიურ კავშირშია, როგორც იმპორტიორებთან ისე დისტრიბუტორებთან და მაღაზიათა ქსელებთან. მარაგების არსებობა დაადასტურა დღეს გარემოს დაცვისა და სოფლის მეურნეობის მინისტრმა ლევან დავითაშვილმაც. 

„კომერსატი“  დისტრიბუტორთა ბიზნეს ასოციაციას დაუკავშირდა, რათა გაერკვია აქვთ თუ არა მთავრობასთან მჭიდრო კომუნიკაცია და არსებობს თუ არა პანიკის საფუძველი პროდუქტთან დაკავშირებით.

„ლარის კურსსაც  ხალხი აუფასურებს და პროდუქტებზეც თავად ზრდიან ფასებს და არა კომპანიები, ეს მათი პანიკისგან გამოწვეული მდგომარეობაა“- ამის შესახებ დისტრიბუტორთა ბიზნეს ასოციაციის ხელმძღვანელმა ივა ჭყონიამ განაცხადა და აღნიშნა, რომ მთავრობასა და მათ შორის ყოველდღიური კავშირია.

„მოსახლეობა პანიკაშია, რაც იწვევს ეკონომიკური მდგომარეობის დაღმასვლას. ყიდულობენ რამდენიმე თვის მარაგს და საკუთარ თავებს ხელოვნურად უზრდიან პროდუქციის ფასს. ხმამაღლა ვაცხადებ, რომ პროდუქციაზე არანაირი დეფიციტი არ არსებობს.  პანიკა არის უსაფუძვლო, რამაც გამოიწვია ვალუტის გაუფასურება, რაც გრძელვადიან პერსპექტივაში ჩვენს ქვეყანას უფრო მეტად დაარტყამს, ვიდრე ახლა, რადგან გაზრდილი ფასების დაჭერა და შემცირება  ძალიან გაჭირდება. რაც შეეხება დაცარიელებულ დახლებს, თუ ერთი სახეობის ზეთი არ დაგხვდებათ დახლზე არის მეორე და მესამე სახეობა, ამიტომ მოსახლეობას მოვუწოდებ, არ ჩავარდნენ პანიკაში და ნუ ასტიმულირებენ ბაზარს, რომ ფასები გაიზარდოს.“-ამბობს ივა ჭყონია.

დისტრიბუტორთა ბიზნეს ასოციაციის ხელმძღვანელი სოცუალურ ქსელში გავრცელებულ კადრებსაც შეეხო და განაცხადა, რომ სხვა ქვეყნებისგან განსხვავებით საქართველო ამ მხრივ ყველაზე მომზადებულია.

„ის რაც უცხოეთში ხდება არის ჩვეულებრივი მოვლენა, აჩვენებენ მაღაზიებს დაცარიელებული დახლებით. ქართველებისგან განსხვავებით ბევრ ქვეყანას არ აქვს ფუფუნება უბნის მაღაზიებში ჩავიდნენ და პროდუქტები ყოველდღიურად შეიძინონ. იქ ჰიპერმარკეტები ქალაქგარეთაა ამიტომ გადიან და იმარაგებენ პროდუქტს, ჩვენ კი არჩევანი დიდი გვაქვს, თითო უბანს რამდენიმე მაღაზია აქვს, ამიტომ ნუ შევქმნის პანიკას, როდესაც ამისა საფუძველი არ არსებობს.“-ამბობს ივა ჭყონია.

 შეგახსნებეთ, რომ შეხვედრა პრემიერ-მინისტრის ხელმძღვანელობით შექმნილი უწყებათაშორისი საკოორდინაციო საბჭოს მიერ კორონავირუსთან დაგეგმილი ბროძოლის პრევენციული ღონისძიებებისა და დაგეგმილი რეგულარული შეხვედრების ფარგლებში გაიმართა.

ნათია ლომიძე