„საოჯახო ტექნიკაზე მოთხოვნა არ შემცირებულა, მეტიც ამ პერიოდში პროდუქტის დეფიციტიც გვაქვს. მაგალითად, სარეცხ მანქანებზე - „ბეკო“ ვერ ასწრებს პროდუქციის წარმოებას,“ - ამის შესახებ „კომერსანტს“ ტექნიკის კომპანია „ბეკო“— ს გენერალურმა დირექტორმა მეჰმედ მელექმა განუცხადა.
ირკვევა, რომ ახალმა, პანდემიურმა რეალობამ ტექნიკაზე მოთხოვნა არათუ შეამცირა, არამედ მკვეთრად გაზარდა. როგორც მეჰმედ მელექმა აღნიშნა, სახლში ყოფნის პერიოდში ყველაზე მეტად მოსახლეობაში საყოფაცხოვრებო ტექნიკის საჭიროება დადგა, როგორებიცაა მაცივარი, გაზქურა და სარეცხი მანქანა.
ასევე დისტანციურ რეჟიმზე სწავლისა და სამუშაო პროცესის გადასვლამ კომპიუტერული ტექნიკის ჭარბ მოთხოვნაზეც იმოქმედა. ნიუთბუქები, კომპიუტერული აქსესუარები და მათ შორის მობილურებიც, დღეს ისეთი მოთხოვნადია, როგორც არასდროს.
„სახლში როცა ხარ, გჭირდება სარეცხი მანქანა, მაცივარი და გაზქურა - აქედან გამომდინარე, ამ პროდუქციებზე დიდი მოთხოვნა იყო. მარტიდან დღემდე, უფრო მეტი მოთხოვნა იყო ნოუთბუქზე, ზრდა დისტანიურ რეჟიმზე სწავლამ და მუშაობამ გამოიწვია . კომპანია „ბეკოს“ ქარხნები აქვს შვიდ ქვეყანაში, მაგრამ მოთხოვნა მსოფლიოს მასშტაბით იმხელაა, რომ წარმოებას ვერ ასწრებს,“ - ამბობს მეჰმედ მელექი.
ლარის კურსის ცვლილებისა და პანდემიის გამო მოქალაქეების შემოსავლების შემცირების მიუხედავად „ბეკომ“ სამი ახალი ბრენდის პროდუქცია დაამატა, მათ შორის ერთ-ერთი ქართული ტექნიკის ბრენდიცაა.
„ზოგადად ბაზარზე გარკვეული ვარდნა არის, მაგრამ ჩვენ ეს საკითხი დიდად არ შეგვეხო, რადგან მისაღები ფასი შევიანრჩუნეთ. ლარის კურსი თუ გაიზარდა 8%-ით, ჩვენ ფასები 2-3 %- ით გავზარდეთ, რეალურად გამოვიდა 5% ფასდაკლება. ამით ჩემი მარჟა შემცირდა, მოგება კი არ მაინტერესებს. ამ მძიმე პერიოდში მდგომარეობის შენარჩუნება, თანამშრომლების შენახვა, მაღაზიების შენხავა უფრო პრიორიტეტულია.
დავამატეთ სამი ახალი ბრენდი ჩვენს ქსელებში: Veox - ეს არის ევროპული ბრენდი, რომელიც შევდეთიდან ექსკლუზიურად შემოგვაქვს. ამ ბრენდს აქვს მაცივრები, კონდინციონერები, წვრილი ტექნიკა. ამის გარდა დაბალი სეგმენტის ბრენდი არის. ასევე საქართველოში ჩემი თანამშრომლების მიერ შექმნილი ბრენდია Milene - ამ ბრენდის მაცივრები, კონდინციონერები, გაზი, გამათბობლები შემოვიტანეთ,“ - ამბობს „ბეკოს“ დირექტორი.
რაც შეეხება მომხმარებლის მსყიდველუნარიანობას, მეჰმედ მელექი მიიჩნევს, რომ მომხმარებელს მეტი ხელშეწყობა სჭირდება და ბანკებს ბევრად უკეთესი პირობები უნდა ჰქონდეთ.
„რეგულაციები შემსუბუქდა, პირობები გაუმჯობესებულია, მაგრამ მომხმარებელს უფრო მეტი ხელშეწყობა სჭირდება, რომ პროდუქცია განვადებით იყიდოს. რა პირობებიც არის ამჟამად ვფიქრობ, რომ მომხმარებლისთვის არ არის საკმარისი, მით უმეტეს ამ პანდემიის პერიოდში“, - განმარტავს მეჰმედ მელექი.
2021 წლის მეორე მესამე კვარტალში „ბეკო“ მოთხოვნის უფრო მეტად ზრდას ელოდება და შეაბამისად ახალი ობიექტების გახსნასაც გეგმავს.
მარიამ მორგოშია