ICR ჯგუფი, რომელიც ფეხსაცმლის, ტანსაცმლის, აქსესუარების, ავეჯის 80-მდე საერთაშორისო ბრენდს, კვების ობიექტებს და 400-მდე მაღაზიას აერთიანებს, გარკვეული ბრენდების დახურვას განიხილავდა. მათ შორის აღმოჩნდა ჩანთებისა და აქსესუარების ბრენდი PARFOIS-იც, თუმცა როგორც აღმოჩნდა, მაღაზია ქართულ ბაზარს არ ტოვებს და მხოლოდ ფილიალების შემცირებით შემოიფარგლება.
„კომერსანტთან“ საუბრისას ICR GROUP-ის კომერციულმა დირექტორმა ზურა ადეიშვილმა, მომხმარებელთა ქცევის ცვლილებაზე ისაუბრა.
როგორც აღმოჩნდა, ადამიანები ძირითადად პირველადი მოხმარების საგნების შეძენას ანიჭებენ უპირატესობას. ხოლო ჩანთები და აქსესუარები ინტერესის მიღმა დარჩა.
„არსებული სიტუაცია ყველაზე ძალიან აქსესუარების ბიზნესზე აისახა, რადგან მოთხოვნა დაეცა. ფეხსაცმელი და ტანსაცმელი მაინც პირველადი მოთხოვნის პროდუქტია და ასე რადიკალურად რეალიზაციები არ შემცირებულა. ჩანთებისა და აქსესუარების მიმართულებაში კი - შემცირდა.
რაც შეეხება დახურვას, ამ ეტაპისთვის ისეთ მაღაზიებს ვხურავთ, რომლებსაც პანდემიამდეც პრობლემა ჰქონდათ, თუმცა პანდემიამ გადაწყვეტილების მიღება დააჩქარა.
„პარფოისის“ რამდენიმე მაღაზია შევამცირეთ, თუმცა საბოლოო დახურვის გადაწყვეტილება არ მიგვიღია და არსებულ სიტუაციაზე ვართ დამოკიდებული. რა თქმა უნდა, არ გვინდა დახურვა და თუ რაღაც გაუმჯობესება შევნიშნეთ რამდენიმე მაღაზიას დავტოვებთ და შემდეგ შეიძლება ისევ განვავითაროთ. ხოლო, თუ ასე გაგრძელდა ალბათ საბოლოოდ დავხურავთ.
მთავარი პრობლემა მაინც რეალიზაციის შემცირებაა. „კორსო იტალიაშიც“ ვყიდით აქსესუარებს, რომლის რეალიზაციაც არ შემცირებულა, რადგან უფრო დაბალი სეგმენტია და ხელმისაწვდომი ფასებია, ხოლო „პარფოისი“ უფრო საშუალო ფასიანი ბრენდია. „ - განმარტავს ზურა ადეიშვილი
ზურა ადეიშვილის თქმით ფასების ცვლილებას ჯერ-ჯერობით თავს არიდებენ, თუმცა ლარის კიდევ უფრო გაუფასურების შემთხვევაში მათ სხვა გზა არ დარჩებათ.
„რეალურად როცა იზრდება კურსი მსყიდველუნარიანობა მცირდება, ანუ შემოსავალი მომხმარებელს ლარში არ ეზრდება, თუ გაეზრდება - ისიც მხოლოდ ერთეულებს.
ამ ეტაპზე ფასებს არ ვცვლით. ვაკვირდებით ბაზარს და სიტუაციას, რის მიხედვითაც უახლოეს მომავალში მივიღებთ გადაწყვეტილებას. თუ კიდევ ზევით წავა კურსი, სამწუხაროდ ჩვენ იძულებული ვიქნებით, რომ გავზარდოთ ფასები, რადგან 100%-ით იმპორტი გვაქვს და შესაბამისად ევროსა და დოლარზე ვართ დამოკიდებული, - აღნიშნავს ზურა ადეიშვილი.
როგორც ICR GROUP-ის კომერციული დირექტორი განმარტავს, რომ პანდემიის გამო პროდუქციის რეალიზაცია საგრძნობლად შემცირდა. შესაბამისად, გასული წლის ანალოგიურ პერიოდთან შედარებით, წელს სულ სხვა სურათია.
„მოგება და ზარალი დასათვლელია, რის მიხედვით გამოჩნდება სიტუაცია. პანდემიის ფონზე რეალიზაციები შემცირებული იყო. ჯამურად რომ ავიღოთ, წლის განმავლობაში (1 სექტემბრამდე ) სადღაც 30%-ით შემცირდა. თუმცა, 10 სდექტემბრიდან მოყოლებელი, როცა პანდემია ისეც გააქტიურდა და შემთხვევებმაც მოიმატა (ასევე, სკოლის დაწყების გადადებაც აისახა). გასული წლის ანალოგიურ პერიოდთან ფაქტობრივად 50-60%-ით არის შემცირებული.
რაც შეეხება შეღავათებს - მეიჯარეებთან ვთანამშრობლობთ. პანდემიის დაწყებისას, როდესაც მაღაზიები დაიკეტა, ჩვენ იმთავითვე დავიჭირეთ თადარიგი და მოვილაპარაკეთ მეიჯარეებთან. შესაბამისად, წლის ბოლომდე საშეღავათო პერიოდზე შეთანხმებული ვართ. თუმცა, თუ ასე გაგრძელდა, მეიჯარეებსაც და მოიჯარეეებსაც მომავალ წელთან დაკავშირებით კიდევ ერთხელ მოუწევთ შეთანხმება და მოლაპარაკება.„ - ამბობს ზურა ადეიშვილი
ადეიშვილის განცხადებით სამომავლო გეგმებზე ფიქრი და პროგნოზების განსაზღვრა საკმაოდ რთულია, რადგან ყველაფერი სიტუაციის განვითარებაზეა დამოკიდებული.
„ძაან რთულია რაღაც მოლოდინებზე საუბარი, რადგან დღევანდელი რეალობა უკვე სხვანაირია და ვერ ვაკეთებთ ვერანაირ პროგნოზს.
ჯერჯერობით ანტიკრიზისული გეგმა არ გვაქვს, ვამზადებთ ბიუჯეტს და მოვლენებზე დაკვირვების შემდეგ აუცილებლად შევიმუშავებთ.
თუ სიტუაცია სტაბილური იქნება და კურსიც თუ დარეგულირდება მომდევნო წლისთვის დაგეგმილი გვაქვს ახალი ბრენდის შემოტანა. კონკრეტული ბრენდების დასახელებისგან თავს შევიკავებ, თუმცა გვინდა რომ მულტიბრენდი გავაკეთოთ. წელსაც გვქონდა დაგეგმილი სიახლეები, თუმცა შემდეგი წლისთვის გადავავადეთ.“ - აცხადებს ზურა ადეშვილი
ანი ცარციძე