ბროლისა და ფაიფურის ერთერთი ყველაზე ძვირადღირებული მაღაზია საქართველოში „ვეჯვუდ შოურუმი“ 12 ევროპული და ამერიკული ბრენდის ოფიციალური წარმომადგენელია. თითოეული ჭურჭელი თუ დეკორაცია განეკუთვნება იმ კატეგორიას, რომელსაც მხოლოდ მაღალშემოსავლიანი მყიდველი ჰყავს, ან საშუალოშემოსავლიანი, რომელიც საჩუქრად აპირებდ ძვირადღირებული ბროლისა თუ ფაიფურის შეძენას. „კომერსანტი“ კიდევ ერთხელ დაინტერესდა, თუ რამდენად აისახა კორონავირუსის პანდემიით გამოწვეული კრიზისი მაღალშემოსავლიანი კატეგორიისთვის განკუთვნილი პროდუქციის მოხმარებაზე. როგორც „ვეჯვუდ შოურუმის“ დამფუძნებელი და დირექტორი ნელი ნადირაძე გვიყვება, საშუალო ფასის პროდუქციის რეალიზაცია მკვეთრად შემცირდა, ხოლო მაღალშემოსავლიანი მომხმარებლები პანდემიის მიუხედავად ე.წ. ლაქშერი პროდუქციაზე უარს არ ამბობენ.
„პანდემიას რა თქმა უნდა გავლენა ჰქონდა და შესაბამისად ეს აისახა ციფრებზეც. ეს ისეთი ნივთებია, რომელსაც „საშვილიშვილოს“ ეძახიან და არის ნივთები, რომელთაც ქორწილებსა და დაბადების დღეებზე საჩუქრად ყიდულობენ. შესაბამისად, როდესაც შემცირებულია ქორწილები და მსგავსი აღნიშვნები, საშუალო შემოსავლიანი ადამიანისთვისაც ნაკლები ინტერესის მატარებელი გახდა ფაიფურიც და ბროლიც. თუ მაღალი შემოსავლის მქონე ადამიანზეა საუბარი, მას პირიქით, პანდემიის პირობებშიც კი, თუ მოუნდა თავისი ჭურჭლისა თუ დეკორაციის გადახალისება, ძალიან მარტივად მოვა და განაახლებს. ასეთი შემთხვევაც გვქონია და მათთვის ნაკლებად არის განმსაზღვრელი პანდემია არის, თუ არა. იმ კატეგორიისთვის, ვისთვისაც მნიშვნელოვანია ხარისხი და უნდა ერთი ნივთი ჰქონდეს და კარგი, ამ შემთხვევაში ბევრად შემცირებულია რეალიზაცია. ვერ ვიტყვით, რომ ჩვენთან მხოლოდ მაღალშემოსავლიანი ხალხი მოდის, არის საშუალო შემოსავლის მქონე ადამიანებიც თუმცა ახლა ნაკლებად.
„ვეჯვუდი“ ესაა ბრიტანული პროდუქცია, კომპანიან ფრანგული გერმანული და ამერიკული ფაიფურისა და ბროლის ბრენდების ოფიციალური წარმომადგენელია საქართველოში. როგორც კომპანიის დირექტორი აღნიშნავს, ყველა პროდუქტი განსაკუთრებით მაღალი ხარისხის კატეგორიას განეკუთვნება. ამჟამად მომწოდებლები ნაკლები დატვირთვით მშაობენ, შესაბამისად ახალი პროდუქციის მოწოდებაც ხშირად დროში გაწელილია.
მარიამ მორგოშია