დაბალი იმუნიზაციის ფონზე ეპიდემიოლოგების მიერ ცოტა ხნის წინ გამოთქმულ მოსაზრებას, რომ პანდემიის მართვის პროცესს ,,რაღაც“ დააკლდა, ბიზნესიც იზიარებს. ყველაზე მეტად მათი შენიშვნა მთავრობის მიერ გაწეულ საინფორმაციო კამპანიას უკავშირდება. როგორც უძრავი ქონების სფეროს კონსულტანტი, ბიზნესმენი დავით გრიგალაშვილი „კომერსანტთან“ საუბრისას აცხადებს, შესაძლებელი იყო ინფორმაციის ლამაზად შეფუთვა და სწორად მიტანა მოსახლეობამდე, რაც ვაქცინაციის პროცესში მეტ დამაჯერებლობას შეიტანდა.
,,ჩვენ დაგვაკლდა კომუნიკაცია, რეკლამა, ინფორმაცია მოქალაქეებამდე ვერ მივიდა სწორად და დამაჯერებლად. ვაქცინაციის მიმართ ნეგატიურად განწყობილ ადამიანებზე ამანაც იმოქმედა. კარგ რეკლამას არაფერი სჯობს, როგორ შეფუთავ, როგორ მიაწვდი, რომ ხალხი დააჯერო. არ უნდა დააშინო, პირიქით, დააფიქრო, ვაქცინაციის უპირატესობაში დაარწმუნო და პოზიტიურად განაწყო. აი, ეს დამაკლდა, საბოლოოდ მივიღეთ ვაქცინის მიმართ უნდობლად განწყობილი შეშინებული საზოგადოება, რომელიც მთავრობის მიერ განხორციელებულ ანტიპანდემიურ ღონისძიებებს სკეპტიკურად უყურებს. ამდენად, ხალხს რეკლამა დააკლდა, ბიზნესს - მომხმარებელი, რომელიც არ შეუშინდება გამოწვევებს და ჩადებს ინვესტიციას. ცხადია, ეს არ არის მხოლოდ ქართული პრობლემა, სხვა ქვეყნებსაც უჭირთ, მათაც არანაკლებ შეეხო პანდემია, მათ შორის, მეზობელ რეგიონებშიც“, - აცხადებს დავით გრიგალაშვილი ,,კომერსანტთან“.
ანტიპანდემიური ღონისძიებები მეტნაკლებად მისაღებია კომპანია ,,აგარის შაქრის“ დირექტორის ალხან ალიზადესთვის. მისი თქმით, ცალკეული ბიზნესების მხრიდან საჭიროა მეტი პასუხისმგებლობა, რეგულაციების სათანადო დაცვა, რაც პანდემიის დონეზეც დადებით გავლენას მოახდენდა.
,,მთავრობა აკეთებს ყველაფერს, რაც შეუძლია და რა რესურსიც აქვს. ვერ ვიტყვი, რომ რაღაც დააკლეს, ძალიან თამამი ნათქვამი გამომივა, მე უფრო ბიზნესის პასუხისმგებლობის საკითხი მგონია. სხვებზე ვერ ვისაუბრებ, ჩვენს შემთხვევაში, ვცდილობთ ზედმიწევნით დავიცვათ რეგულაციები, უსაფრთხოება, სისტემატურად ჩავატაროთ ტესტირება, რასაც კანონი მოითხოვს. რაც შეიძლება კეთდება, მაგრამ მოსახლეობამდეც უფრო აქტიურად უნდა მივიდეს ინფორმაცია, სხვა შენიშვნები არ მაქვს“, - ამბობს ალიზადე ,,კომერსანტთან“.
რაც შეეხება ,,აგარის“ ქარხნის მუშაობას, მისი თქმით, პრობლემები დაძლეულია და ჩვეულ რეჟიმში აგრძელებენ საქმიანობას, ყოველგვარი დაბრკოლების გარეშე. შესაბამისად, არც პანდემიური პროცესების ნეგატიურ გავლენას განიცდიან.
ალხან ალიზადეს ინფორმაციით, ამ ეტაპზე კომპანიაში 500 ადამიანია დასაქმებული.
შეგახსენებთ, რომ ,,აგარის შაქარმა“ სრული დატვირთვის მუშაობა 2021 წლის 1-ლი აპრილიდან განაახლა. ქარხანამ მუშაობის განახლება სახელმწიფოს მხარდაჭერით მოახერხა. ქარხანა წლის ბოლომდე 70 000 ტონა შაქრის ნედლეულის გადამუშავებას გეგმავს.
რაც შეეხება ფაქტს, რომ პანდემიური პროცესების მართვას საინფორმაციო კამპანია დააკლდა, რამდენიმე დღის წინ NCDC-ის დირექტორმა ამირან გამყრელიძემაც განაცხადა.
მარი ჩიტაია