გლობალური პანდემიის გავლენა გარდა იმისა, რომ ონლაინ ვაჭრობის კოლოსალურ ზრდაზე აისახა, ამავდროულად გამოიკვეთა სუპერმარკეტების ქსელებში მომხმარებლის უპირატესობებიც. როგორც აღმოჩნდა, მოსახლეობა ფაქტობრივად უარს ამბობს მზა საკვების ყიდვაზე და განსაკუთრებით ისინი, ვინც ჯერ კიდევ დისტანციურად მუშაობენ, საკვების სახლში მომზადებას ამჯობინებენ.  

პანდემიის შემდგომ როგორ შეიცვალა მომხმარებელთა ქცევა, რა პროდუქტებზე შემცირდა მოთხოვნა და რას ანიჭებს მომხმარებელი უპირატესობას - ამ კითხვებით„კომერსანტი“ სუპერმარკეტების ქსელ „გუდვილის“ გენერალურ დირექტორს გიორგი ხაბაშვილს დაუკავშირდა.

როგორც  ხაბაშვილი ამბობს, მოთხოვნა მზა კვების პროდუქციებსა და ბოთლის ღვინოზე შესამჩნევად შემცირებულია, თუმცა გაყიდვების ზრდის ტემპი პირველადი მოხმარების პროდუქტებზე გამოიკვეთა. 

“იქიდან გამომდინარე, რომ პანდემიის პერიოდში ბევრი დისტანციურ მუშაობაზე გადავიდა, მოთხოვნა მზა კვების პროდუქციაზე შემცირებულია. როდესაც მომხმარებელი ძირითადად დისტანციურად მუშაობს და ოფისში არ გადის, რა თქმა უნდა, მზა კვების მიმართულებით მოთხოვნაც ნაკლებია. თუმცა, ამ თვალსაზრისით, სიტუაცია ნელ-ნელა უმჯობესდება. ასევე, პანდემიის პერიოდში ბოთლის ღვინის გაყიდვებია ძალიან შემცირებული.

ეს კლება ზოგად გაყიდვებზე საკმაოდ მძიმედ აისახა, თუმცა ციფრების დაკონკრეტებისგან თავს შევიკავებ.

პირველადი მოხმარების პროდუქციაზე მოთხოვნა გაზრდილია. ძირითადად ეს საკვებს ეხება, როგორიცაა - ბურღულეული, კვერცხი, გაყინული პროდუქცია და ა.შ. „ - განმარტავს გიორგი ხაბაშვილი.

როგორც გიორგი ხაბაშვილი აღნიშნავს, სიტუაციის პროგნოზირება ძალიან რთულია, თუმცა „გუდვილი სტრატეგიულ გეზს არ ცვლის  და ახალი პროექტის „გუდვილი გურმეს“ გაფართოებას დედაქალაქსა და რეგიონებში აპირებს. 

„ამ პერიოდში აქტიურად ვმუშაობთ ონლაინ-გაყიდვების მიმართულებით, ვცდილობთ, რომ ბაზარზე გავაქტიურდეთ. მოგვიწია მარჟების შემცირება იმისათვის, რომ  მომხმარებელს უფრო მეტი შესაძლებლობა ქონდეს, შესყიდვები განახორციელოს.

სიტუაცია მკაფიოდ პროგნოზირებადი ვერ იქნება. თუ პანდემიის ტენდენცია შენარჩუნდა, ამ შემთხვევაში ნახტომისებურ გაუმჯობესებებს არ ველოდებით. იგრძნობა, რომ მომხმარებელიც და ზოგადად საზოგადოება ნელ-ნელა ეჩვევა  ამ გლობალურ პრობლემასთან თანაცხოვრებას. 

ჩვენი სტრატეგია უცვლელია — ახალი ფორმატი, რომლითაც ჩვენ შემოვედით ბაზარზე „გუდვილ გურმე“ , მის გაფართოებაზე ვფიქრობთ და ვმუშაობთ.

რეგიონებში ჯერ არ არის გურმე წარმოდგენილი და ამ პროექტის აქტიურად განვითარება მხოლოდ თბილისში ხდება. შემდეგ ეტაპებზე რეგიონებშიც განვავითარებთ. 

უკან დახევის სტრატეგია არ გვაქვს, რადგან ეს კარგს არაფერს მოიტანს. თუმცა, ორგანიზაციაში მაქსიმალურად ვცდილობთ პროცესების ოპტიმიზაციას - აღნიშნავს „გუდვილის“ გენერალური დირექტორი. 

ანი ცარციძე