წყალსათხილამურო სპორტი საკმაოდ გავრცელებული ტრენდია მთელს მსოფლიოში, ის სულ სხვა ნიშაა ტურისტებისთვის, სადაც ძირითადად შეძლებული ხალხია ჩართული.
საქართველოს წყალსათხილამურო სპორტს რამდენიმეწლიანი ისტორია აქვს. 90-იან წლებში მალთაყვამ ევროპის ჩემპიონატსაც კი უმასპინძლა.
ფოთში, მალთაყვის „ოქროს ტბის“ ტერიტორიაზე წყალსათხილამურო სპორტის განვითარება 2019 წელს დაიწყო - ამ ტბას წლების წინანდელი ფუნქცია დაუბრუნდა და „საქართველოს ვეიკპარკი“ გაიხსნა. წყლის თხილამურებით გასეირნებისა და სხვადასხვა წინაღობების გადალახვის სურვილით ვეიკპარკს ადგილობრივები და ტურისტები სტუმრობდნენ.
თუმცა, პანდემიის გამო, ვეიკპარკმა ამერიკელი და უკრაინელი ინვესტორების მხარდაჭერა დაკარგა და ამჟამად ადგილობრივ ინვესტორებთან მოლაპარაკებები მიმდინარეობს. ვეიკპარკის საქმიანობა კი დროებით გაჩერებულია.
„პანდემიამ ყველანაირად გაგვაჩერა, ვეიკპარკთან ერთად ფესტივალებიც გვაქვს და ყველაფერი დაპაუზებულია. გაფართოებას ვგეგმავთ და ამაზე პარლამენტში პროექტი მაქვს განსახილველად შეტანილი. წინასწარ ვერ ვისაუბრებ დეტალებზე, თუ რას გულისხმობს ეს გაფათოება რადგან ჯერ „ჰაერში ჰკიდია“ და განხილვის საგანია.
პანდემიის გამო, სპონსორები დავკარგეთ, გვყავდა ამერიკელი და უკრაინელი ინვესტორები, რომელთაც თავი შეიკავეს ინვესტრებსგან და ახლა ადგილობრივ ინვესტორებთან გვაქვს მოლაპარაკება. დროებით ყველაფერი დახურულია, თუმცა აუცილებლად განახლდება. ეს ჩემი საქმეა და მივყვები თავიდან ბოლომდე,“ - ამბობს ვეიკპარკის დამფუძნებელი რატი მელია.
უახლოეს მომავალში ვეიკპარკის უკან კაფე-ბარის მოწყობა და კემპინგ არეალის განვითარება იგეგმება. როგორც დამფუძნებლები ამბობენ, ამისთვის გადაწყვეტილია სიმბოლურად იმ ტრანსპორტის გამოყენება, რომელიც 1991 წლის ჩემპიონატზე ამ ტერიტორიაზე მოსულ სტუმრებს ემსახურებოდა.
1991 წელს რომან მელიამ და მისმა მეგობარმა გურამ დოლბაიამ პირველად განავითარეს წყალსათხილამურო სპორტი საქართველოში, ამ წელს პირველ დამოუკიდებელ საქართველოში, ფოთში, ოქროს ტბაზე ევროპის ჩემპიონატი ჩაატარეს. ჩამოსული იყო 23 ქვეყანა. ჩემპიონატს აშუქებდა BBC, CNN, Euronews, Eurosport -თითქმის ყველა უცხოური მედია. მთელმა მსოფლიომ მაშინ გაიცნო საქართველო და ფოთი. წლების მერე რომან მელიას შვილიშვილი რატი მელია წყალსათხილამურო სპორტის ფედერაციის საქმიანობაში ჩაერთო და 4 წელი ცდილობდა დაფინანსების მოპოვებას.
ვეიკპარკში განხორციელებული ინვესტიციის საერთო ღირებულება 45 ათას აშშ დოლარს შეადგენს. სასრიალო მანძილი სიგრძეში 200 მეტრს მოიცავს. 5 წუთით თხილამურებზე დადგომა 10 ლარი ღირს, 10 წუთი - 15 ლარი, ხოლო 1 საათი - 70 ლარი ღირს. როგორც რატი მელიამ აღნიშნა პარკის უკან იგეგმება კაფე ბარის მოწყობაც.
მალთაყვის ტერიტორიაზე 5 სხვადასხვა ტიპის ტრამპლინია დამონტაჟებული. ტბის ორივე მხარეს 9- 9 მეტრის სიმაღლის ბოძებია განთავსებული და მათ შორის რკინის ტროსია გაბმული. თხილამურზე დგომისას გზად გხვდება ტრამპლინები და სხვადასხვა ტრიუკები სრულდება.
რაც შეეხება უსაფრთხოებას, დამფუძნებლების თქმით, ექსტრემალური სპორტის არც ერთი სახეობა არ იძლევა 100 პროცენტიან უსაფრთხოების გარანტიას, თუმცა სტუმრებისთვის აუცილებელია ამ მიზნით ჩაფხუტისა და ჟილეტის ტარება და ხმელეთზე სპეციალური ინსტრუქტაჟის გავლა.
მარიამ მორგოშია
ფოთი
