ექიმი ენტონი ფაუჩი ამბობს, რომ კოვიდ-19 შეერთებულ შტატებში „პანდემიის ფაზიდან გამოვიდა“. იმის მიუხედავად, რომ კორონავირუსი კვლავ აგრძელებს ამერიკელთა ინფიცირებას, არის ჰოსპიტალიზაციის და სიკვდილობის შემთხვევებიც, შესაძლოა, რომ კოვიდ-19 თანდათან ენდემიური დაავადების სახეს იღებდეს.

ამერიკის წამყვანმა ინფექციონისტმა აღნიშნული განცხადება სამშაბათს, ამერიკულ საზოგადოებრივ რადიოსთან „ფი-ბი-ესი“ (PBS) ინტერვიუში გააკეთა. ჩვენ „აღარ გვაქვს დღეში 900 000 ახალი ინფექციის და ათობით ათასი ჰოსპიტალიზაციის, თუ ათასობით სიკვდილობის მონაცემი“ - ამბობს ფაუჩი. მისი თქმით, ომიკრონის ვარიანტის ახალი ტალღის შემოტევის შემდეგ, ახლა კორონავირუსის მონაცემები ამერიკაში გაცილებით დაბალია და შესაძლოა ეს იყოს ენდემიურ დაავადებაში გადასვლის ფაზა.

თუმცა, მას მოგვიანებით ამ განცხადებასთან დაკავშირებით განმარტებების გაკეთება მოუწია. ოთხშაბათს, „ვაშინგტონ პოსტთან“ კომენტარში, ექიმი ფაუჩი ამბობს: „მსოფლიოში ჯერ კიდევ პანდემიაა. ეს ეჭვგარეშეა. ამის სხვაგვარი ინტერპრეტაცია შეუძლებელია. ჩვენ ჯერ ჯიდევ პანდემიაში ვართ“ - განაცხადა მან.

მართალია, ამერიკაში ბოლო თვეებში პანდემიის მონაცემებმა ზამთრის თვეებთან შედარებით მნიშვნელოვნად იკლო, თუმცა ბოლო კვირაში, წინა კვირასთან შედარებით, მაინც 25%-ით მოიმატა. ამასთან, ჯანდაცვის სპეციალისტებს თვალი უჭირავთ მაღალი გავრცელებით გამორჩეულ ახალ ვარიანტებზე და მათ შესაძლო თანმხლებ რისკებზე.

დღეისთვის კოვიდ-19-ის საბოლოო მონაცემები ამერიკაში ასე გამოიყურება: 81 მილიონზე მეტი ინფიცირების შემთხვევა და 992 000-ზე მეტი გარდაცვალება. პრეზიდენტ ჯო ბაიდენის ადმინისტრაციის პოლიტიკის მიხედვით, ამერიკა კოვიდ-19-თან თანაცხოვრებას ცდილობს. თეთრი სახლი აცხადებს, რომ ახლა ადამიანებს პანდემიასთან ბრძოლის მეტი ინსტრუმენტი აქვთ: ვაქცინაცია, დამატებითი დოზები და მედიკამენტები.

წყარო: www.amerikiskhma.com