გლობალური პანდემიის პერიოდში ყველის მწარმოებელი ქართული კომპანია „ალპიას“ პროდუქციაზე მოთხოვნა საგრძნობლად გაიზარდა.

როგორც „კომერსანტს“ „ალპიას“ დამფუძნებელმა დარეჯან კანთელაძემ განუცხადა, ქვეყანაში რძის დეფიციტის მიუხედავად, ადგილობრივ ბაზარზე საკმაოდ დიდი კონკურენციაა.

„კარანტინის დროს, როცა მოცემულ სტანდარტებს ბევრი კომპანია ვერ აკმაყოფილებდა და მიწოდება შეზღუდული იყო, ჩვენს  პროდუქციაზე მოთხოვნა 200%-ით გაიზარდა და ჩვენი კომპანია ყველა სტანტარტის დაცვით ფუნქციონირებდა. შედარებით რთული, კარანტინის შემდგომი პერიოდი იყო, რადგან ბაზრები გაიხსნა და მომხმარებელმაც იაფფასიანი რძის ფხვნილსა და პასტაზე დამზადებულ ყველზე გააკეთა არჩევანი. ქვეყანაში რძის დეფიციტია, ეს კი გაურკვეველი, არაჯანსაღი წარმოშობის ირანული რძის პასტითა და ფხვნილით ივსება. მსგავს პროდუქტს ჩვენ ხარისხით ვებრძვით, თუმცა ფასებით ისინი გვჯობნიან.

ჩვენ დაბალ ფასს ვერ დავადებთ, რადგან საქართველოში რძის წარმოება იაფი არ ჯდება. ამიტომ, ფაქტობრივად არაკონკურენტუნარიანები ვხდებით, თუმცა ბრძოლას მაინც ვაგრძელებთ. დანარჩენი მომხმარებლის გადასაწყვეტია“, - განმარტავს დარეჯან კანთელაძე.

კომპანია „სანტამ“, რომლის ნაწარმიც „ალპიას“ სახელითაა ცნობილი, მომხმარებლებში დიდი დაინტერესება გამოიწვია და სამომავლოდ რძემჟავა პროდუქტების დამატებას გეგმავს.

„დაინტერესება ძალიან მაღალია. „გუდვილის“ ქსელში 5 სახეობის ყველი შეგვაქვს. ყოფილა შემთხვევა, როდესაც მარკეტში პროდუქციის მარაგის ამოწურვისას მომხმარებელს ჩვენთან დაურეკავს პროდუქტის შეძენის თხოვნით.

თუმცა დაბალფასიანი ნაწარმი მაინც დიდ კონკურენციას გვიწევს. მიუხედავად ამისა ალტერნატივა გვაქვს - როდესაც რძის ჭარბი რაოდენობაა, გარდა იმერული ყველისა, რომელიც 2-3 დღიანი ყველია, ვაწარმოებთ ქარხნულ და ევროპულ ყველს, რომლებიც დამწიფებას და დავარგებას საჭიროებს. ამისთვის სპეციალური საწყობები და მაცივრები გვაქვს. ვასაწყობებთ პროდუქციას და ზაფხულში, როცა გაყიდვები ჭირს ვაწარმოებთ ამ ყველს, რომელიც მთელი წლის მანძილზე იყიდება. ასევე, სამომავლოდ რძემჟავა პროდუქტების დამატებას ვგეგმავთ“, - აღნიშნავს დარეჯან კანთელაძე.

კომპანია „სანტა“, რომლის საინვესტიციო ბიუჯეტი ჯამში 1.5 მლნ ლარს აღწევს, 2009 წლიდან ფუნქციონირებს და პროდუქცია „გუდვილის“, „ორი ნაბიჯისა“ და „წისქვილის“ რესტორნების ქსელში შეაქვს.

ანი ცარციძე