მაშინ, როდესაც მსოფლიოში კომპანია კოკა კოლა გაყიდვების ანტირეკორდს ამყარებს, გლობალური პანდემიის პირობებში საქართველოში „კოკა-კოლა“-ს გაყიდვების რეკორდული მაჩვენებელი დაფიქსირდა. პროდუქციის რეალიზაცია დაახლოებით 45%-ით გაიზარდა.
როგორც „კოკა-კოლა ბოთლერს ჯორჯიას“ დამფუძნებელმა თემურ ჭყონიამ „კომერსანტთან“ განაცხადა, საქართველო ერთ-ერთია მსოფლიოს იმ 5 ქვეყნიდან, სადაც პანდემიის პირობებში „კოკა-კოლა“-ზე მოთხოვნამ საგრძნობლად მოიმატა.
„ჩვენი პროდუქციის რეალიზაცია ამ პერიოდში დაახლოებით 45%-ით არის გაზრდილი. ჩვენც და კომპანიის ოფისიც შოკირებულები ვართ, რომ მოთხოვნა არის ძალიან მაღალი. პანდემიის პირობებში ადამიანები ყიდულობენ ხარისხიან და სანდო პროდუქტს. „კოკა-კოლა“-ს მიმართ კი სანდოობა ძალიან დიდია. აქედან გამომდინარე „კოკა-კოლა“-ს რეალიზაციაც გაიზარდა.“ - განმარტავს თემურ ჭყონია.
მსოფლიოს მასშტაბით სურათი სრულიად განსხვავებულია.
კომპანიის მონაცემების მიხედვით, 30 წლის განმავლობაში პირველად, კორონავირუსის პანდემიის ფონზე „კოკა-კოლა“-მ გაყიდვების კუთხით ანტირეკორდი დაამყარა. პროდუქციის გაყიდვების ბიუჯეტი 7.1 მლრდ აშშ. დოლარს შეადგენს, რაც წინა წელთან შედარებით ($ 9.9 მლრდ) 30%-იან ვარდნას ნიშნავს.
გარდა პანდემიისა, ჯანსაღი ცხოვრების წესი უფრო მეტად აქტუალური ხდება, რის ფონზეც მოთხოვნა გაზიან სასმელებზე ყოველ წელს იკლებს. სწორედ ეს გახდა მთავარი მიზეზი „ კოკა-კოლა“-ს ახალი ენერგეტიკული ხაზის Coca-Cola Energy-ს გამოშვების.
„კოკა-კოლა“-ს მთავარ ოფისში 2020 წლის ბოლოს სიტუაციის გამოსწორებას ვარაუდობენ.
ანი ცარციძე