„პანდემიის პერიოდში იახტების მყიდველთა რაოდენობა კიდევ უფრო გაიზარდა. მაგრამ, თუ დაწყებით ეტაპზე საუბარი იყო პატარა ზომის იახტებსა და კატერებზე, ახლა უკვე შესამჩნევია მოთხოვნა დიდი და საშუალო ზომის იახტებზე,“ - ამის შესახებ „კომერსანტს“ იახტების მშენებელი უმსხვილესი კომპანია Azimut-Benetti Group-ის წარმომადგენელმა საქართველოში, Azimut Georgia-ს დირექტორმა გიორგი ჩიკვაიძემ განუცხადა.
საქართველოში Azimut-ის წარმომადგენლობა 2017 წლიდან ოპერირებს, შეთავაზებული იახტები კი მოიცავს ისეთ მოდელებს, როგორებიცაა Flybridge, Atlantis, S-collection, Magellano, Grande. ცოტა ხნის წინ კი, როგორც გიორგი ჩიკვაიძემ აღნიშნა, კომპანიის მოდელებს დაემატა FLYBRIDGE 53 და MAGELLANO GRANDE 25.
საქართველოში იახტების მიმართულება და ინტერესი პანდემიის პერიოდში განსაკუთრებით გაიზარდა. როგორც Azimut Georgia-ში განმარტავენ, ქვეყანაში გაყიდული იახტების საშუალო ფასი თუ პანდემიის დასაწყისში 45 000 ევროდან იწყებოდა, ძვირადღურებულ მოდელებზე მოთხოვნის ზრდის შედეგად ეს ფასი ახლა 600 -დან 800 ათას ევრომდე მერყეობს.
„სულ გაყიდულია 11 იახტა და აქედან 2 იახტა გასულ კვირას დაემატა, რაც მნიშვნელოვანი
შედეგია. ყველა იახტა სეზონის შუა პერიოდამდე უკვე ბათუმში იქნება - ყველა მყიდველი
ქართველია და იახტები განთავსდება საქართველოში. საქართველოში გაყიდული იახტების ნაწილში
ისე იზრდება საშუალო ფასი, როგორც გაყიდული
იახტების ზომა - დაახლოებით ესაა, საშუალოდ 600 დან 800 ათას ევრომდე.
საკმაოდ გაზრდილია ინტერესი ჩვენი კომპანიის მეორად იახტებზე, ეს გამოწვეულია დიდი იახტების მიმართ მოთხოვნის ზრდით, რაც უფრო ხელმისაწვდომ ფასებში მეორად კატეგორიაში მოიძებნება.
ამჟამად ორი აქტიური მოლაპარაკება გვაქვს უცხოელ მყიდველებთანაც, კერძოდ მონტენეგროში და მათთვის დიდი ზომის იახტების ჩასაბარებლად ვემზადებით,“ - ამბობს ჩიკვაიძე.
Azimut Georgia-ს დირექტორი „კომერსანტს“ საქართველოში საიახტო ინდუსტრიის განვითრების გადამწყვეტ მნიშვნელობაზე ესაუბრა და აღნიშნა, რომ უახლოეს მომავალში ამ სფეროსთვის მნიშვნელოვანი ინფრასტრუქტურული სიახლე დაინერგება, თუმცა მისივე თქმით, დეტალები მოგვიანებით გახდება ცნობილი.
„რამდენიმე დღეა ძალიან მნიშვნელოვანი სამუშაო პროცესი მიმდინარეეობს და გადავდივართ პირველ აქტივობებზე - მალე ძალიან დიდი ინფორმაციით დაგიბრუნდებით, თუმცა ჯერ დეტალებზე ვერ ვილაპარაკებ და ეს ეხება ამ სფეროში ინფრასტრუქტურის განვითარებას. მჯერა, რომ ინფრასტრუქტურის განვითარება არ არის მხოლოდ ერთი კონკრეტული ბიზნესმენის ინტერესი, ეს არის სახელმწიფო ინტერესი. ამ დარგის განვითარება საქართველოსთვის იქნება გადამწყვეტი ტურისტული მიმართულებით და მაღალმხარჯველობითუნარიანი ტურისტის მოზიდვის ყველაზე სწრაფი გზა.
როცა გვაქვს ასეთი ლამაზი ზღვის სანაპირო, სასტუმროები, საცხოვრებელი კომპლექსები, მგონია რომ აქამდეც უნდა ყოფილიყო ეს მზარდი ინტერესი საიახტო ინდუსტრიის მიმართ, მაგრამ სჯობს გვიან, ვიდრე არასდროს, „ - ამბობს ბიზნესმენი.
Azimut-Benetti Group-ი იახტინგის სექტორში უდიდესი კერძო ჯგუფია, რომელიც 40 წელიწადზე მეტია ოპერირებს და აწარმოებს პროდუქციას 6 გემთსაშენზე, მათ წარმოებაში კი 40 ზე მეტი მოდელია.
კომპანიაში აქციების უდიდესი პაკეტის მფლობელი ბოლო 40 წელია კომპანიის დამფუძნებელი პაოლო ვიტელია. Azimut-Benetti Group-იის ისტორია კი 1969 წლიდან იწყება, როცა პაოლო ვიტელიმ იახტების დაქირავებისა და ფრანგული სანაპიროების შესწავლის შემდეგ მეგობართან ერთად ტუნისში კომპანია დააარსა.
მარიამ მორგოშია