„პანდემიამდელი პერიოდისგან განსხვავებით ახლა შოპინგია ყველაზე მთავარი მიზეზი, რის გამოც ქართველები ქვეყნიდან გადიან“ - ამის შესახებ რადიო „კომერსანტის“ გადაცემაში „კომერსანტის დილა“ PMCG-ის უმცროსმა მკვლევარმა ნანა ქაჯაიამ ისაუბრა, მისი თქმით, წინა პერიოდებში ყველაზე გამოკვეთილი მიზეზი მეგობრების და ნათესავების მონახულება იყო, ახლა ეს მაჩვენებელი მთლიანი ვიზიტების მხოლოდ 22%-ს შეადგენს.
„რაც შეეხება ხანგრძლივობას, თუ აქამდე ძირითადად გასვლების ხანგრძლივობა 4 ღამეს შეადგენდა, დღეს ეს მაჩვენებელი შეცვლილია და შეადგენს 6 ღამეს, ეს ციფრი იქიდან გამომდინარეობს, რომ გაზრდილია ფრენის ხარჯები და ამან შესაბამისად მოგზაურების გადაწყვეტილებაზე იმოქმედა და შესაბამისად მათ მისცა მოტივაცია, რომ მეტი დრო გაატარონ ამა თუ იმ ქვეყანაში.
გასვლით ვიზიტებში ისეთი კარგი მდგომარეობა არ არის, როგორც საერთაშორისო ვიზიტებში. ამ შემთხვევაში 2022 წლის დანახარჯებს, 2019 წლის დანახარჯებისთვის არ გადაუჭარბებია, 2022 წელს უცხო ქვეყანაში დანახარჯებმა დაახლოებით 1,8 მილიარდი შეადგინა, მაშინ როდესაც 2019 წელს ეს რიცხვი 2 მილიარდი იყო.“ - აღნიშნა ნანა ქაჯაიამ.
ნანა ქაჯაიას თქმით, მეორე კვარტლიდან მოყოლებული გასვლითმა ტურიზმმა საკმაოდ სწრაფი ტემპებით დაიწყო აღდგენა და 2022 წელს ვიზიტების რაოდენობა წინა წელთან შედარებით სამჯერ არის გაზრდილი, ხოლო პანდემიამდელი მაჩვენებლის 71% შეადგინა.
„პანდემიამდელ პერიოდში ქართველები სტატისტიკურად მეზობელ ქვეყნებში მოგზაურობდნენ და შემდეგ ადგილზე იყო ევროკავშირის და სხვა ქვეყნები. ახლა აზერბაიჯანის მიმართულებით მიდგომა შეცვლილია, რადგან აზერბაიჯანს სახმელეთო საზღვარი აქვს ჩაკეტილი და ფრენა ძვირი ჯდება, შესაბამისად აზერბაიჯანი საერთაშორისო ვიზიტებიდან ამოვარდნილია.
რაც შეეხება თურქეთს , ეს მიმართულება 2019 წელთან შედარებით 80% ით არის აღდგენილი, თუმცა ვიზიტების ძირითადი რაოდენობა შოპინგზე მოდის.
რუსეთის იმ ქვეყნებს შორისაა, სადაც პანდემიამდელ მდგომარეობასთან შედარებით გასვლების რაოდენობა გაზრდილია, ამის ერთ-ერთ ფაქტორად შეიძლება ჩავთვალოთ ის ფაქტი, რომ რუსეთში არსებული რუბლის კურსი და საქართველოში არსებული რუბლის კურსი ერთმანეთისგან მკვეთრად განსხვავდებოდა და შესაბამისად ადამიანები რუსეთიდან გამოგზავნილ ფულს რუბლებში იღებდნენ და შემდეგ რუსეთში სხვა კურსით ახურდავებდნენ,“ - აღნიშნა ნანა ქაჯაიამ.
თაკო კვაჭანტირაძე