კორონავირუსმა მთელ მსოფლიოში ბევრი რამ შეცვალა, მათ შორის ორგანიზებული კრიმინალი საგრძნობლად გაიზარდა. ეროვნული საზღვრების დაკეტვა, გადაადგილების თავისუფლების შეზღუდვა, ნარორეალიზაციის საერთაშორისო მიწოდების ჯაჭვების დარღვევა - საერთაშორისო დანაშაულებრივი სინდიკატები ზარალს ითვლიან.
თუმცა, კარტელები და დანაშაულებრივი დაჯგუფებები სიტუაციასთან ადაპტირების უნარს ავლენენ - ისინი კრიზისში საკუთარი თავის ჰუმანისტებად და ქველმოქმედებად წარმოჩენას ცდილობენ. სავარაუდოდ, საშუალოვადიან პერსპექტივაში ორგანიზებული კრიმინალი ამ კრიზისიდან გაძლიერებული გამოვა.
პანდემიის პირობებში დანაშაულებრივმა ბანდებმა დაბნეულ ღარიბ მოსახლეობასთან თანაშმშრომლობა მკვეთრად გააუარესა.
ასევე მათ სამეწარმეო სულისკვეთება გამოავლინეს მათთვის სრულიად ახალ მიმართულებებზე - მაგალითად, პირბადეების, სადეზინფექციო მასალების და კორონავირუსის ტესტების ქურდობა და გაყიდვა. ლათინურ ამერიკაში რამდენიმე ახალი მარშრუტი ამუშავდა, რომლის მეშვეობითაც სხვადასხვა ქვეყანაში კონტრაბანდული სამედიცინო პროდუქცია შედის, შემდეგ კი არალეგალურად იყიდება.
ბანდები და ნარკოკარტელები გაჭირვებულ მოსახლეობას აქტიურად ეხმარებიან - ძირითადად ეს იმ უკიდურესად ღარიბ ფენას შეეხება, რომელმაც მთავრობისგან დახმარება ვერ მიიღო. მექსიკაში, ბრაზილიაში, სალვადორში ბანდებმა და ნარკოკარტელებმა თავიანთი კომენდანტის საათი შემოიღეს და მთავრობისგან განსხვავებით, მას საკმაოდ ეფექტურად აკონტროლებენ.
მექსიკური ნარკოკარტელები ღარიბ მოსახლეობას კვების პროდუქტებს ურიგებენ. სამხრეთ იტალიაში, ნეაპოლში და პალერმოში, მაფიას კვების პროდუქტები პირდაპირ სახლებში მიაქვს. ასეთი გზით მაფიოზები მოსახლეობის მხარდაჭერის გაძლიერებას ცდილობენ.
ასევე ისინი რთულ ეკონომიკურ მდგომარეობაში მყოფი მცირე და საშუალო ბიზნესის წარმომადგენლებს ეხმარებიან. გრძელვადიან პერსპექტივაში ეს ძალზე საშიში პროცესია - ბევრ ქვეყანაში ბანდები უკვე დიდი ხანია სასამართლოს და სამართალდამცველებს ანაცვლებენ, კარანტინის დროს ისინი უკვე სოციალურ ფუნქციებს კისრულობენ.
ეს ის შემთხვევაა, როდესაც მაფია სახელმწიფოს სისუსტეს იყენებს, თუმცა, ბანდიტები მოსახლეობაზე გავლენას ხშირად სახელმწიფოსთან შეთანხმებით აძლიერებენ - ბანდიტები უღარიბეს ფენებს გადარჩენაში ეხმარებიან, და ამით მთავრობებს ცხოვრებას უადვილებენ.
მოსალოდნელი ეკონომიკური კრიზისიც მაფიას და კარტელებს ახალ შესაძლებლობებს უხსნის - ისინი თავიანთ საქმიანობაში სოციალურად დაუცველების და უმუშევრებს ჩათრევას შეეცდებიან და სავარაუდოდ, წარმატებულადაც.
თანაც ხშირად ისინი როგორც დამსაქმებლები იქცევიან და მომავალ თანამშრომლებს კარიერული ზრდის ბევრ ვარიანტს სთავაზობენ - ნარკოვაჭრობა, პროსტიტუცია, რეკეტი, ასევე ლეგალური საქმიანობა, ისეთი როგორიცაა სამშენებლო კომპანიები, სხვადასხვა ფირმები და არასამთავრობო ორგანიზაციები.
ასევე ბანდიტები მოსახლეობის მათზე დამოკიდებულების გაზრდას ცდილობენ. ისინი ღარიბ ოჯახებს თავიანთ საეჭვო ოპერაციებში ძალიან მარტივი და ეფექტური მეთოდებით ითრევენ - ჯერ ეხმარებიან, შემდეგ კი ამის სანაცვლოდ გარკვეულ საზღაურს, ხშირად ძალის გამოყენებით, მოითხოვენ.
ეს ყველაფერი დანაშაულებრივ საქმიანობაში მოსახლეობის მხრიდან ჩართულობას და ბანდიტების მოქმედებების დაფარვას ხელს უწყობს. მაფიოზები და კარტელები სოციალურ სოლიდარობაზე და გავლენაზე დამყარებულ დანაშაულებრივ ქსელებს ქმნიან, და ამ სისტემაში რიგითი ადამიანები მათი თანამზრახველები ხდებიან.
გაჭირვებული ადამიანებისთვის დახმარების გაწევის მიუხედავად, მაფიოზები, ბანდიტები, და ნარკოკარტელები საბოლოო ჯამში მაინც ცხვრის ტყავში გამოწყობილი მგლებად რჩებიან.