მსოფლიოში სურსათის მარაგის მხრივ მოლოდინები მკვეთრად ნეგატიურია. დიდი ალბათობით, პანდემია გლობალური წარმოების მასშტაბს საგრძნობლად შეამცირებს. მოსალოდნელ საფრთხეზე ბოლო წლების განმავლობაში საერთაშორისო ორგანიზაციები მუდმივად საუბრობს, მათ შორის, გაერო. ცხადია, ზომების მიღება მოუწევს მსოფლიოს ყველა სახელმწიფოს, მათ შორის საქართველოს, სადაც, სპეციალისტების განმარტებით, განსაკუთრებული ყურადღება სტრატეგიულ მარაგებზე უნდა გაკეთდეს.
აგრარული სფეროს სპეციალისტი ბადრი რამიშვილი ,,კომერსანტთან“ აცხადებს, რომ ზომები გასაძლიერებელია, რადგან სტრატეგიული მარაგების სიმცირე ქვეყანაში შიმშილობას გამოიწვევს.
,,ყველაფერი უნდა გაკეთდეს, რათა სტრატეგიული პროდუქტების მარაგის მხრივ ქვეყანაში პრობლემა არ გაჩნდეს. ჯერჯერობით სტაბილური მდგომარეობა გვაქვს და ეს მოცემულობა მომდევნო წლების განმავლობაშიც უნდა შევინარჩუნოთ. ზომებს თუ არ გავაძლიერებთ, საქართველოში შიმშილი გარდაუვალია. პანდემიამ ისე შეცვალა მსოფლიო, რომ არავინ იცის, როდის რა შეიძლება მოხდეს, ღმერთმა ნუ ქნას, რომ მსოფლიოში ვითარება გართულდეს. ამიტომ სწორედ სტრატეგიული პროდუქტების წარმოების ზრდაზე უნდა ვიფიქროთ, პირველ რიგში, ხორბლით მომარაგების საკითხია გადასაწყვეტი. დიდწილად რუსეთზე ვართ დამოკიდებული, რომელიც მუდმივად ძვირდება, ამიტომ დროულად არის პრევენციის ზომები მისაღები, - აცხადებს რამიშვილი.
კიდევ ერთი საკითხი, რაც სურსათის უსაფრთხოებას უკავშირდება, კვების რეჟიმი და სასურსათო პროდუქტის კალორიულობაა, რაც დეფიციტზე არანაკლები პრობლემაა.
სოფლის მეურნეობის განვითარების საერთაშორისო ასოციაციის ხელმძღვანელი კობა კობალაძე ფიქრობს, რომ ტექნოლოგიების განვითარება პირველი ნაბიჯია, რითაც საქართველომ პრობლემის მოგვარება უნდა დაიწყოს.
,,ჩვენ ქვეყანას აქვს რეალური შესაძლებლობა, რომ გამოკვებოს საკუთარი მოსახლეობა და იმპორტზე მინიმალურად იყოს დამოკიდებული. განსაკუთრებული ყურადღება მიწას და წყალს უნდა მიექცეს, რასაც ტექნოლოგიური განვითარების გარეშ ვერ მივაღწევთ. ჩემი აზრით, უნდა დავიწყოთ მიწების დამცავი სასოფლო-სამეურნეო ტექნოლოგიის და ტექნიკის გამოყენება. ბოლო დროს მთავრობის მხრიდან გარკვეული პროექტები განხორციელდა, მაგრამ მეტად უნდა გააქტიურდეს მუშაობა, რათა გლობალურ გამოწვევას გავუმკლავდეთ. დიდი საფრთხეა, რომ სურსათის დეფიციტამდე შეიძლება დადგეს წყლის გამოყენების პრობლემა. შეიძლება, ფიზიოლოგიურ დონეზე შიმშილობის პრობლემა არ გვემუქრება, თუმცა ე.წ. ძვირი კალორიები ხალხისთვის მიუწვდომელია. შესაბამისად, რაციონში პური დიდი რაოდენობით გამოიყენება“, - განმარტავს კობალაძე.
ცნობისთვის, 2021 წელს გაერო-მ კაცობრიობისთვის გლობალური სასურსათო კრიზისი იწინასწარმეტყველა. ორგანიზაციამ აღნიშნა, რომ პლანეტა უზარმაზარი სირთულეების წინაშე აღმოჩნდა. პანდემიამ და ბუნებრივმა კატასტროფებმა სოფლის მეურნეობა მნიშვნელოვნად დააზარალა.
დედამიწაზე 1970-იანი წლებიდან ბუნებრივი კატასტროფების რიცხვი სამჯერ გაიზარდა.
მარი ჩიტაია