მთელს დასავლეთში დისტანციურ მუშაობაზე გადასვლის გამო, მამაკაცები ოფიციალურ კოსტიუმებზე და ჰალსტუხებზე უარს სულ უფრო მეტად ამბობენ. ალბათ კლარკ გეიბლს ეს გაუხარდებოდა, ბარაკ ობამაც და ვლადიმერ პუტინიც არ იქნებოდნენ წინააღმდეგნი, თუმცა, მოდების სახლი Brioni სირთულეებს განიცდის, ფრანგული Kering იტალიურ წარმომადგენლობაში შტატებს ამცირებს. აქ 321 თანამშრომლიდან 220 -მა სამსახური დატოვა.
Brioni-ის პრობლემები ჯერ კიდევ 2011 წელს დაიწყო, როდესაც კომპანიის დავალიანებამ 100 მლნ. ევროს მიაღწია, მაგრამ პანდემიამ განთქმულ ბრენდს მძიმე დარტყმა მიაყენა.
იტალიაში, სადაც მოდის ინდუსტრიის ბრუნვა 80 მლრდ. ევროა, და სადაც 500 000 ადამიანი მუშაობს, Brioni-ის პრობლემებმა დიდი ხმაური გამოიწვია. კომპანია ამ მძიმე მდგომარეობაში მარტო არაა, მოდის სახლები Valentino და Balmain-იც კრიზისს განიცდიან და, ოფიციალურის ნაცვლად, სპორტული სტილის ტანსაცმლის წარმოების ზრდას აპირებენ.
სტატისტიკითაც დასტურდება, რომ კოსტიუმების მწარმოებლებისთვის მძიმე ხანა დადგა. 2020-2021 წლებში თანამშრომელთა დიდი ნაწილი დისტანციურ მუშაობაზე გადავიდა და, კოსტიუმ-ჰალსტუხის ნაცვლად, ვიდეო-კონფერენციების დროს ჯინსებს და მაისურებს იცვამს. იმის მიუხედავად, რომ მათი ნაწილი უკვე ჩვეულებრივ სამუშაო რეჟიმს დაუბრუნდა, ნაწილი მაინც დისტანციაზე დარჩა, თუმცა, სამსახურებში გამოსულებს შორის ბევრმა ახალი ჩვევები შეინარჩუნა.
შტატებში დრეს-კოდის შერბილება ოფისებში ჯერ კიდევ პანდემიამდე დაიწყო. 2019 წლის მარტში GoldmanSachs თავის 36 000 თანამშრომელს სამსახურში კოსტიუმ-ჰალსტუხის გარეშე შესვლის უფლება მისცა.
2 წლის შემდეგ მთელს მსოფლიოში ოფიციალური ტანსაცმლის გაყიდვები მცირდება. ბაზრის კვლევის კომპანია Mintel-ის ინფორმაციით, 2020 წელს კოსტიუმ-ჰალსტუხების გაყიდვები 29%-ით დაეცა. ეს ამ დარგისთვის ძალიან სერიოზული ვარდნაა.
თუმცა, გერმანული Hugo Boss-ის ახალი გენერალური დირექტორი დენიელ გრიდერი ოპტიმიზმს ინარჩუნებს. მისი თქმით, 2021 წლის მე-3 კვარტალში მისი ბრენდის გაყიდვები 2019 წლის ანალოგიურ პერიოდთან შედარებით 7%-ით გაიზარდა.
თუმცა, ამ ეტაპზე ეს ზრდა ჩვეულებრივი, ყოველდღიური ტანსაცმლის გაყიდვების ხარჯზე მოხდა, მაგრამ კომპანია კოსტიუმ-ჰალსტუხების წარმოებაზე უარი თქმას არ აპირებს.
დღეს ოფიციალური ტანსაცმლის ბრენდების მთელი ყურადღება აზიისკენაა მიპყრობილი, სადაც ჯერ კიდევ არ ჩანს ის ტენდენცია, რაც ევროპაში და ამერიკაშია
ჩინეთი მამაკაცებს ჯერ კიდევ აქვთ ოფიციალურად ჩაცმის ვალდებულება და ეს ბევრი მსხვილი ბრენდისთვის ნამდვილი შველა აღმოჩნდა.
მაგალითად, მამაკაცების ტანსაცმლის კიდევ ერთი საერთაშორისო ბრენდი Zegna გაყიდვების ზრდაზე საუბროს. ეს იტალიური კომპანია ხსენებული ტენდენციის გამო 2020 წელს და 2021 წლის დასაწყისში მძიმე მდგომარეობაში აღმოჩნდა, თუმცა, ჩინეთის წყალობით, 2021 წლის მეორე ნახევარში 50%-ით, 603 მლნ. ევრომდე გაიზარდა.
ავტორი: თენგიზ აბლოთია
წყარო: Le Monde