ღამის კლუბმა “ხიდი“ ორწლიანი პაუზის შემდეგ 8 ოქტომბერს საპილოტე ღონისძიება დააანონსა. გავრცელებული ინფორმაციის თანახმად, 16–საათიან საპილოტე ღონისძიებაზე კლუბის რეზიდენტები და თბილისური სცენის ახალი ტალღის წარმომადგენლები დაუკრავენ.

“საპილოტე ღონისძიება OPEN CULTURE: KHIDI მიზნად ისახავს დახურულ სივრცეებში Covid-19 გავრცელების რისკების კვლევას, კვლევის შედეგებზე დაყრდნობით სახელმძღვანელო დოკუმენტის შემუშავებასა და ქვეყნის მასშტაბით საერთო სტანდარტის დანერგვას, რაც საკლუბო, საფესტივალო და საშემსრულებლო ხელოვნების წარმომადგენლებს 2 წლიანი კრიზისის დაძლევასა და სიცოცხლისუნარიანობის შენარჩუნებაში დაეხმარება. 8 ოქტომბერს, სტუმართა ჯანმრთელობის მდგომარეობის პრევენციული შემოწმების მიზნით გამოყენებული იქნება სპეციალური აპლიკაცია, რომელიც სტუმრების კოვიდ სტატუსის იდენტიფიცირებას უზრუნველყოფს“, - წერია კლუბი „ხიდის“ მიერ დაგეგმილი ღონისძიების აღწერაში.

ღონისძიებაზე დასწრება სრულად ვაქცინირებულ (მეორე აცრიდან 2 კვირის შემდეგ), ბოლო 6 თვის მანძილზე კოვიდგადატანილ ან ბოლო 48 საათის განმავლობაში ჩატარებული PCR ტესტის უარყოფითი პასუხების მქონე პირებს შეეძლებათ. აცრილ სტუმრებს რეგისტრაცია პორტალ covidpass.moh.gov.ge - ზე უნდა ჰქონდეთ გავლილი, რადგან კლუბი არ იღებს აცრის დამადასტურებელ ამობეჭდილ დოკუმენტს.

საპილოტე ღონისძიებაზე დასწრება შესაძლებელია სამი სავალდებულო დოკუმენტის წარდგენის შემთხვევაში:

• წინასწარ გენერირებული უნიკალური ბარკოდი.

 • ღონისძიების ონლაინ ბილეთი.

 • პირადობის დამადასტურებელი მოწმობა.

კლუბის ადმინისტრაციის ინფორმაციით

• ტესტირება ადგილზე არ კეთდება.

• არ დაიშვებიან ანტიგენის სწრაფი ტესტის უარყოფითი პასუხის მქონე პირები.

ღონისძიებაზე დასასწრები ბილეთის ფასი 40 ლარიდან 50 ლარის ფარგლებში მერყეობს, კარზე მოქმედებს Face და Age კონტროლი.

Open Culture - ელექტრონული მუსიკისა და საკლუბო კულტურის აღდგენის ფონდის და არადომინანტური კულტურისა და შემოქმედებითი კოლექტივების მხარდამჭერი პლატფორმა act4culture-ის მიერ ინიცირებული იდეაა, რომელიც უსაფრთხო ღონისძიებების მომზადების, ორგანიზებისა და რეაგირების სტრატეგიას წარმოადგენს.

თაკო კვაჭანტირაძე