ავსტრიაში მცხოვრები ქართველი ღვინის ექსპერტი და გასტრონომი ბუთა დოლიძე უკვე 17 წელია, ევროპაში ქართული ღვინის პოპულარიზაციაზე მუშაობს. ის  „კომერსანტთან“ ინტერვიუში გვიყვება, რომ ქართული ღვინის ავსტრიულ, ფრანგულ და იტალიურ ღვინოსთან „შეჯიბრი“ შრომატევადი პროცესია, ამას ემატება ავსტრიაში მიმდინარე აქტიური კამპანია ადგილობრივი პროდუქტის პოპულარიზაციისთვის. პანდემიის გამო ქართული ქვევრის ღვინო ავსტრიაში უკვე ორი წელია არ შესულა. ქვეყანა პანდემიის დასასრულს უახლოვდება, ობიექტები აქტიურად იხსნება და ბუთა დოლიძე იმედოვნებს, რომ ქართული ღვინის მიმართ ინტერესიც გაიზრდება.

„ავსტრიაში ყველაფერი ამუშავდა ჩვეულებისამებრ, 1–ლი ივლისიდან უკვე პირბადეებიც აღარაა საჭირო და კომენდანტის საათიც იხსნება - ამუშავდება კლუბები, ყველა რესტორანი და ვაქცინაციაც წარმატებულად მიდის. გეგმა არის, რომ ოქტომბრამდე 5 მილიონი ადამიანი უნდა იყოს ვაქცინირებული. აცრის ჯიხურები დააყენეს და ნებისმიერ ადგილასაა შესაძლებელი ვაქცინისა და ტესტის გაკეთება. მოგზაურობაც ჩვეულებრივად ხდება მახლობელ ქვეყნებში“, - ამბობს ღვინის ექსპერტი

ავსტრიის ხელისუფლება სტუმარმასპინძლობის სფეროს განსაკუთრებულად უწყობდა ხელს, ყველა ობიექტი, პანდემიამდელი ბრუნვის 80 პროცენტს სახელმწიფოსგან დახმარების სახით იღებს.

„სახელმწიფო ყველანაირ ბიზნესს გვერდით ედგა, იყო ისეთი ნიუანსები, როგორიცაა ის, რომ ახალი გახსნილი ბიზნესისთვის არ იყო განკუთვნილი სახელმწიფო დახმარება, თუმცა სხვა ტიპის ხელშეწყობა იყო, როგორიცაა სპეციალური დაბალპროცენტიანი ან უპროცენტო კრედიტები და ა.შ.

გასტრონომიის სფერომ მილიარდობით ევროს დახმარება მიიღო. სტუმარმასპინძლობის სფერო სუბსიდიას 6 თვის მანძილზე იღებდა. ბიზნესი წერდა განაცხადს  და მათ ერიცხებოდათ წინა წლის ბრუნვის 80 პროცენტი. ეს ძალიან დიდი შეღავათი იყო რესტორნებისთვის, იმაზე მეტი რაც შეეძლოთ ამ სფეროს ბიზნესს წარმოედგინა,

რაც შეეხება ქართულ ღვინოს, უკვე 2 წელიწადია ღვინო არ წაგვიღია ავსტრიაში გასაყიდად. მე შედარებით ძვირადღირებულ სეგმენტზე ვმუშაობ, ვისზეც ვმუშაობ მათგან შეკვეთა არ მოგვსვლია. მთელი ქვეყანა გადასულია ავტრიული პროდუქციის მოხმარებაზე და ერთგვარი კამპანიაა ავსტრიელი გლეხის დახმარება. ღვინის შემდეგი წამოღება საქართველოდან დაგეგმილი გვაქვს სექტემბერში და იმედი გვაქვს, პანდემია აღარ იქნება ხელისშემშლელი.

ამ პატარა ქვეყანაში არ არის მარტივი ქართული ღვინის პოპულარიზაცია,  ეს დიდ შრომას მოითხოვს და ხარისხიც ძალიან მაღალი უნდა იყოს. ქართული ღვინის ფასი ავსტრიაში 10 დან 50 ევრომდე მერყეობს, ეს აბსოლუტურად ნორმალური ფასია. რა თქმა უნდა, 10 ევროიან ქართულ ღვინოს ავსტრიული 10 ევროიანი ღვინო სჯობია, რადგან ყველაფერთან ერთად ტრანსპორტირების ხარჯებიც ემატება და ამიტომ იზრდება ფასი. მაგრამ ჩვენ ჩვენი სტილისტიკა გვაქვს და სპეციფიური ყურძნებიც მხოლოდ ჩვენ გვაქვს და ეს არის ჩვენი მთავარი ნიშა“, - ამბობს ბუთა დოლიძე.

ბუთა დოლიძე ამჟამად ავსტრიაში უძღვება კომპანიას Buta Qvevri Wine, რომლის მეშვეობითაც საქართველოდან წაღებული ღვინოები ისეთ მაღაზიათა ქსელებში ხვდება, როგორიცაა ავსტრიული Wine und co. როგორც თვითონ ამბობს, მისი მთავარი მიგნება ქვევრის ღვინოა. ღვინო, რომლის დაყენების ქართულ ტრადიციულ მეთოდს 2013 წელს იუნესკოს არამატერიალური კულტურული მემკვიდრეობის ძეგლის სტატუსი მიენიჭა.

მარიამ მორგოშია