„ორბი ჯგუფი ბახმაროს“ სამშენებლო პროცესი პანდემიის გამო შეჩერდა,“-ამის შესახებ „კომერსანტს“ „ორბის“ დირექტორმა ირაკლი კვერღელიძემ განუცხადა.
ბახმაროში 9 მიწის ნაკვეთი კომპანიამ სიმბოლურ ფასად შეისყიდა და 50 მილიონის ინვესტიცია უნდა განახორციელოს, თუმცა ამ ეტაპზე მშენებლობა შეჩერებულია, რადგან სამშენებლო პროცესში ძირითადად უცხოელები არიან ჩართულები. კვერღელაძის თქმით, მშენებლობის განახლება ზაფხულიდან იგეგმება.
„ბუნებრივია პანდემიამ პროცესებზე გავლენა იქონია, რადგან ამ პროექტში უცხოელი სპეციალისტები არიან ჩართულები, რომლებსაც ქვეყნის დატოვება მოუწიათ. როდესაც საზღვრები გაიხსნება, სპეციალისტები ჩამოსვლას შეძლებენ და აქტიურ ფაზაში გავაგრძელებთ ბახმაროს განვითარებას. ვფიქრობ, ზაფხულში გავაქტიურდებით. ყველა დეტალი, რომელიც მშენებლობას უკავშირდება უცვლელია. ჯერ ვერ ვისაუბრებთ დასრულების ვადაზე, რადგან დაწყების ზუსტი დროც არ ვიცით, მოგეხენებათ რომ ახლა პროექტირების სტადიაა“,— განაცხადა ირაკლი კვერღელიძემ.
რაც შეეხება „ორბი ჯგუფის“ სხვა პროექტებს, ამ ეტაპზე დასრულებულია ბაკურიანში არსებული ყველა სამშენებლო სამუშაო და კომპანია მთლიანად ბახმაროს განვითარების გეგმაზეა გადართული.
„ორბის“ დირექტორმა, პანდემიის შემდეგ რეგულაციებზეც ისაუბრა და აღნიშნა, რომ საქართველოს მასშტაბით მდებარე მათი ყველა სასტუმრო, რეგულაციის იმ წესს დაიცავს, რომელიც სახელმწიფომ დააწესა და რომელიც ვირუსის გავრცელებას ხელს შეუშლის.
რაც შეეხება, სასტუმროს ნომრის ღირებულებას, ირაკლი კვერღელიძე განმარტავს, რომ ფასის აწევას ან შენარჩუნებას ბაზარი განაპირობებს, ამიტომ წინასწარ ამაზე საუბარი უჭირს.
შეგახსნებეთ, რომ კურორტ ბახმაროში 9 მიწის ნაკვეთი და მათზე განლაგებული შენობა-ნაგებობები საქართველოს მთავრობამ „ორბი ჯგუფი ბახმაროს“ 1 ლარად მიჰყიდა. ნაკვეთების საერთო ფართობი 43 269 კვ.მ-ია. კომპანიამ სიმბოლურ ფასად გადაცემულ ქონებაზე 5 წლის ვადაში 120 ნომრიანი სასტუმრო უნდა აამოქმედოს.
განკარგულების მიხედვით, რომელსაც პრემიერ-მინისტრმა მამუკა ბახტაძემ ხელი 2019 წლის 15 მაისს მოაწერა, „ორბი ჯგუფი ბახმაროს“ აღნიშნული ქონების გადაცემიდან 10 წლის ვადაში ეკრძალება აქ მრავალბინიანი საცხოვრებელი სახლების მშენებლობა. მთლიანობაში კი კომპანიამ პირადად, ან მესამე პირის მეშვეობით, ჯამში 50 მილიონი ლარის [დღგ-ს გარეშე] ინვესტიცია უნდა განახორციელოს.
ნათია ლომიძე