„სერიოზულ კრიზისში შევდივართ, მაგრამ ჯერ არ ვიცით ფსკერი სად არის. დიაგნოზი ჯერ არავის დაუსვამს და არ ვიცით ეკონომიკის დაავადება რამდენად მძიმეა, ამას თვენახევარში ან ორ თვეში დავინახავთ.“ - ეკონომიკაში შექმნილი გამოწვევები და სამომავლო პერსპექტივები ბიზნესისთვის ქვეყნის ერთერთი უმსხვილესი გადამზიდავი კომპანიის „ისთ გეით ჯგუფის სამეთვალყურეო საბჭოს თავმჯდომარემ და ღვინის მწარმოებელი კომპანია „ვაზიანის ხელმძღვანელმა ირაკლი იაშვილმა ასე შეაფასა.
რამდენიმე დღის წინ ეკონომიკის მინისტრმა ნათია თურნავამ აღიარა, რომ მთავრობა კომპანიების ლიკვიდობის (საბრუნავი საშუალებების) პრობლემას ხედავს და მისი გადაჭრის მიმართულებითაც მუშაობს, თუმცა კონკრეტულად რა მექანიზმებს გამოიყენებს, ეს შედარებით მოგვიანებით გახდება ცნობილი.
„კომერსანტის“ კითხვაზე, თუ რა უნდა იყოს ის მექანიზმები, რითაც მთავრობა კომპანიებს საბრუნავი საშუალებების პრობლემის მოგვრებაში დაეხმარება, ბიზნესმენი ირაკლი იაშვილი, ციფრებისა და კონკრეტული ბერკეტების დასახელებისგან თავს იკავებს, თუმცა, აღნიშნავს, რომ ხელისუფლებისგან გაცოცხლებასა და ჩარევას ყველაზე მეტად ის კომპანიები საჭიროებენ, სადაც იმპორტშემცველი კომპონენტი ძალიან დაბალია. ბიზნესმენი ასევე ხაზს უსვამს, რომ სრული დეკაპიტალიზაციის თავიდან ასაცილებლად მთავრობას კაპიტალის ბაზარზე მნიშვნელოვანი ინტერვენციის შესრულება მოუწევს.
„ჯერ დიაგნოზის დადება ძალიან ადრეა.. როცა ვიქნებით ფსკერზე და გვეცოდინება მაკროეკონომიკური ანალიზი, გვეცოდინება რამდენია კლება ეკონომიკაში, რეცესიაში თუ ვართ , კომპანიების კაპიტალიზაცია სად ჩამოვარდება - მერე შეგვიძლია კონკრეტული ციფრებისა და სფეროების დასახელება. ახლა ნებისმიერი ანალიზი ნაადრევი და არასწორი იქნება ყველას მხრიდან. ფაქტია, რომ მთელი მსოფლიო ამას აკეთებს სხვადასვა ფორმით, კაპიტალის ბაზრებზე აკეთებენ ინტერვენციას, ამერიკელები 2 ტრილიონს ხარჯავენ კაპიტალის ბაზარზე, ჩვენ კი კაპიტალის ბაზარი არ გვაქვს. შესაბამისად, რაღაც ფორმით სახელმწიფოს მოუწევს ძირითად კაპიტალში შესვლა, რათა სრული დეკაპიტალიზაცია არ მოხდეს - ეს სწორი და მართებული გზაა, მაგრამ მექანიზმები რთულია. ჩემი აზრით სახელმწიფო ფინანსურად იმ კომპანიების კაპიტალში უნდა შევიდეს, სადაც იმპორტშემცველი კომპონენტი ძალიან დაბალია, სადაც მაღალია დამატებული ღირებულება. კომპანია თუ ქმნის ქვეყანაში მაღალდამატებულ ღირებულებას და იმპორტშემცველი კომპონენტი დაბალია ის კომაპნიები უნდა გაცოცხლდეს პირველ რიგში და ასე შემდეგ.“- განმარტავს იაშვილი.
პანდემიამ და ბიზნეს საქმიანობის შეჩერებამ მნიშვნელოვნად შეაფერხა კომპანიების შემოსავლიანობა, შესაბამისად გადასახადებისა და სხვადასხვა ვალდებულებების ფონზე კომპანიებს ლიკვიდობის პრობლემა ექმნებათ. რამდენად შეძლებენ ისინი პოსტკრიზისულ ეტაპზე ჯანსაღი ბიზნესის წარმოებას ამ ეტაპზე უცნობია, თუმცა ხუთმა მსხვილმა ბიზნესგაერთიანებამ მთავრობას თხოვნით უკვე მიმართა, რომ ლიკვიდობის პრობლემის გადაჭრაში დაეხმაროს. წერილის ავტორები თვლიან, კარგი იქნება, თუ მთავრობა დროებით გარკვეულ საგადასახადო შეღავათებს დაუშვებს.
მარიამ მორგოშია