„კომენდანტის საათის პირობებში თეატრის მუშაობა ვერანაირად ვერ წარმოგვიდგენია, ამიტომ ჩვენ სპექტაკლები შაბათ-კვირას დავნიშნეთ, როდესაც თეორიულად შესაძლებელია, რომ ადამიანი თეატრში 5 საათზე მივიდეს.“ - ამის შესახებ რადიო „კომერსანტის“ გადაცემაში „კომერსანტის დილა“ ახმეტელის თეატრის სამხატვრო ხელმძღვანელმა ირაკლი გოგიამ ისაუბრა.
მისივე განცხადებით, გამომდინარე იქიდან, რომ სამუშაო საათებში თეატრში ვერავინ მივა და საღამოს საათებში ე.წ. კომენდანტის საათი მოქმედებს, თეატრი კვირის დღეებში მაყურებელს სპექტაკლს ვერ სთავაზობს.
„სამუშაო დღეებში ჩვენ ჩვეულებრივ საღამოს 7 ან 8 საათზე ვთამაშობდით, „კომენდანტის საათიდან“ გამომდინარე მაგ დროს ვერ მოვასწრებთ სპექტაკლს, ამიტომ ერთადერთი რაც შეგვიძლია არის ის, რომ შაბათ-კვირას ვითამაშოთ და ისიც განახევრებულ დარბაზში. ჩვენი დარბაზი დიდი არ არის ბილეთებიც გაიყიდა, თუმცა მსახიობებისთვისაც ძალიან რთულია სერიოზული სპექტაკლის შუა დღეზე თამაში.
იმის იმედი, რომ ბილეთები გაიყიდებოდა ისედაც მქონდა, რადგან ადამიანები ცოცხალ ემოციებს და ურთიერთობებს მონატრებულია, მაგრამ ეს „კომენდანტის საათი“ რომ არ იყოს უკეთესი იქნებოდა, ან დაარეგულირონ ისე, რომ ვთქვათ ვისაც თეატრის ბილთი ექნება მას ღამის საათებში გადაადგილების უფლება ჰქონდეს, როგორც ეს ფეხბურთის შემთხვევაში იყო. ეს მოგვცემს საშუალებას, რომ კვირაში ექვსი დღე ვიმუშაოთ“ - აღნიშნა ირაკლი გოგიამ.
გოგიამ თეატრების ერთ წლიან შეზღუდვაზეც ისაუბრა და განმარტა, რომ ის მსახიობები რომლებიც თეატრის შტატში არ იყვნენ და ანაზღაურებას კონკრეტული სპექტაკლებიდან იღებდნენ მშივრები დარჩნენ.
„ჩვენ არაერთხელ ვთქვით რომ რაღაც ფონდი გამოყოფილიყო, ჩვენმა თეატრმა ჩვენი დანაზოგით შევძელით რომ ჩვენი მსახიობებისთვის ორი თვე აგვენაზღაურებინა, თუმცა ამ ორი თვის შემდეგ ისინი შემოსავლის გარეშე დარჩნენ და ვერც სახელმწიფო დახმარების პროგრამით ისარგებლეს, რადგან რაღაც ძალიან მცირე ჩარიცხვები დაუფიქსირდათ.
თეატრი სახელმწიფოს მიერ კი ფინანსდება, მაგრამ თეატრის შემოსავალი ძალიან ბევრ რაღაცას განაპირობებს, თუნდაც ჩვენი თეატრის მაგალითზე განაპირობებს სადადგმო ხარჯებს და სხვა ძალიან ბევრ ფაქტორს. აქედან გამომდინარე ძალიან მნიშვნელოვანია, რომ თეატრში ფსიქოლოგიური რეაბილიტაციაც მოხდეს.
ჩვენ შეჩვეული ვიყავით სპექტაკლის ყოველდღე თამაშს, ჩვენ შეჩვეული ვიყავთ ახალი სპექტაკლების თეატრის შემოსავლიდან დადგმას, დავრჩით მხოლოდ ხელფასების ამარა, რომელსაც სახელმწიფო გვიხდის და ახლა თავიდან ვიწყებთ სიარულს, როგორც კატასტროფის მერე, ძალიან კარგია რომ მაყურებელმა მოიხედა. მსახიობისთვის ძალიან ძნელია, რომ სცენის გარეშე ერთი წელი გაჩერდეს და ამის შემდეგ ადვილად აიდგას ფეხი.“ - აღნიშნა ირაკლი გოგიამ.
თაკო კვაჭანტირაძე