საქართველოს მეცხრე მოწვევის პარლამენტს უფლებამოსილების ვადა 31 ოქტომბერს ეწურება. ოთხი წლის წინ, 2016 წელს წინა საპარლამენტო არჩევნების დროს, ფრაქცია „ქართული ოცნება-დემოკრატიული საქართველო“ მოსახლეობას სოციალური კეთილდღეობას და სწრაფ განვითარებას დაპირდა. თუმცა, მმართველობიდან ოთხი წლის შემდეგ მოსახლეობა შიმშილობის ზღვარზეა, საქართველოში ფასების საერთო დონე კი რეკორდულად იზრდება.

ამჯერად „კომერსანტი“ ბიზნესმენების მოსაზრებით დაინტერესდა, თუ როგორ აისახა მმართველი გუნდის მიერ გადადგმული ნაბიჯები ბიზნესგარემოსა და მოქალაქეებზე. მიიღო თუ არა ბიზნესმა „კეთილდღეობა და სწრაფი განვითარება“ და რა მოლოდინი აქვთ 2020 წლის საპარლამენტო არჩევნებისგან?

„კოკა-კოლა ბოთლერს ჯორჯიას“ დამფუძნებელი თემურ ჭყონია ამ კითხვაზე პასუხად, ამბობს, რომ წარსულზე საუბრები ვერ განსაზღვრავს იმ მომავალს, რის წინაშეც საქართველო 2 დღეში აღმოჩნდება. მისი თქმით, ყველა მოწინავე პარტიაში მოიძებნება ჯანსაღად მოაზროვე თითო ადამიანი მაინც, სწორედ მათგან მთავრობის დაკომპლექტებითა და კონკურენციის გაზრდით მიიღებს საქართველო ეკონომიკურ წინსვლას, დაამარცხებს სიღარიბეს. ეს ყველაფერი კი ერთპიროვნული მმართველობით დღემდე მიუღწეველია.

„წარსულზე საუბარი ახლა არ არის საინტრესო. უნდა დავიწყოთ მომავალზე ფიქრი, ორ დღეში ძალიან საინტერესო მომავალი გველოდება. მომავალი ჩემი წარმოდგენით არის შემდეგი - აუცილებელია კოალიციური მთავრობის შექმნა იმ მიზეზით, რომ ყველა მოწინავე პარტიაში არის ჭკვიანი და განათლებული ადამიანი. ამ განათლებული ადამინებით უნდა დაკომპლექტდეს მთავრობა. აქ იქნება შეჯიბრი სწორი გადაწყვეტილების მიღებისთვის, განვითარებისთვის, იქნება კონკურენცია თუ ვინ რა შედეგს მოუტანს ქვეყანას და არ იქნება ერთპიროვნული და სუბიექტური გადაწყვეტილებები. ყველა პარტია ეცდება, რომ მოიპოვოს ამომრჩევლის მეტი ნდობა და მხარდაჭერა.  ეს იქნება უნიკალური დემოკრატიული მმართველობა, რომელიც პოსტსაბჭოთა არც ერთ ქვეყანაში არ არის და საქართველომ ეს უპირატესობა უნდა მოიპოვოს.  

ამომრჩეველმა სუბიექტური მიდგომები გვერდით უნდა გადადოს და იფიქროს საქართველოს იმიჯზე, ქვეყნის განვითარებაზე. ქვეყნის დემოკრატიულ და ეკონომიკურ განვითარებაში სიღარიბის დაძლევაში  საქართველოს შეუძლია იყოს არა მდიდარი, მაგრამ შეძლებული ქვეყანა უმკლეს ვადაში. ყველა პარტიის პროგრამა საერთო მსჯელობის ქვეშ თუ მოექცევა და იქნებიან კონკურენტები ქვეყნის განვითარბაში და არა ერთმანეთის დაკნინებაში, მაშინ ძალიან ნათელი მომავალი გველის წინ,“ - განმარტავს ბიზნესმენი.