„ოქროს სია“ 2023 წლამდე არ გაუქმდება, ამის შესახებ საქართველოს ფინანსთა მინისტრის მოადგილემ მამუკა ბარათაშვილმა დარგობრივი ეკონომიკისა და ეკონომიკური პოლიტიკის კომიტეტის სხდომაზე განაცხადა. მისი თქმით, „ოქროს სიაში“ შეყვანილ პირებს კიდევ ერთი წელი ექნებათ უფლება კუთვნილი საქონელი საქართველოს საბაჟო ტერიტორიაზე გამარტივებული პროცედურებით შემოიტანონ ან გატანონ.

ფინანსთა მინისტრის მოადგილის განცხადებით, ასოცირების შეთანხმების ფარგლებში საქართველომ ეტაპობრივად უნდა განახორციელოს ავტორიზებული ეკონომიკური ოპერატორის სისტემის სრულყოფილი ამოქმედება. მამუკა ბარათაშვილის განცხადებით, სწორედ არსებული „ოქროს სიის“ მონაწილეები მოიაზრებიან პირებად, რომლებიც დააკმაყოფილებენ ავტორიზებული ეკონომიკური ოპერატორის სტატუსის მისაღებად აუცილებელ მოთხოვნებს. მისი თქმით, ავტორიზებული ეკონომიკური ოპერატორის სისტემის ამოქმედებისათვის, გარდა საკანონმდებლო ბაზის არსებობისა, აუცილებელია მთელი რიგი ღონისძიებების გატარება, რათა სისტემა სრულფასოვნად ამოქმედდეს.

„დღეს ჩვენთან „ოქროს სია“ მოქმედებს, რომლის მონაწილეები გამარტივებული საბაჟო პროცედურებით სარგებლობენ. „ოქროს სიის“ ჩანაცვლება იგეგმება ეკონომიკური ოპერატორის ცნებით, რომელიც ასოცირების ხელშეკრულებით გათვალისწინებული მოთხოვნა გახლავთ და უფრო მეტ შესაძლებლობას იძლევა ეკონომიკური ოპერატორებისათვის. თუმცა. ეს სისტემური საკითხია, რომლისთვისაც მოსამზადებელია ერთის მხრივ საბაჟო ორგანო, მეორეს მხრივ კი ოქროს სიის მონაწილეები, რომლებიც სავარაუდოდ იქნებიან ეკონომიკური ოპერატორები. ამ პრობლემების მოსაგვარებლად ვფიქრობთ, რომ ერთი წელი საჭიროა ამ მუხლის გადავადება.

რადგან ჩვენ ვითხოვთ ეკონომიკური ოპერატორის საკითხი გადავადდეს, ვითხოვთ იმასაც, რომ „ოქროს სიის“ მოქმედების ვადა გაგრძელდეს. ის გამარტივებული პროცედურები, რომელიც არსებობს, „ოქროს სიის“ მონაწილეებს ეხებათ, თუმცა აქ არ იგულისხმება გადასახადების გადავადება, რომელიც საერთოდ არ არის მიღებული პრაქტიკა. აქ იგულისხმება არსებული ფორმალობების გამარტივება. ის ნაწილი, რომელიც ეკონომიკურ ოპერატორებს ეხებათ, არ არის მხოლოდ ქართულ მხარეზე დამოკიდებული. ეკონომიკური ოპერატორის სტატუსის მინიჭება ჩვენს ოპერატორს, რომელთანაც ხელშეკრულება გვექნება გაფორმებული, აძლევს შესაძლებლობას ისარგებლოს იგივე სტატუსით, რომლითაც საქართველოში სარგებლობს და მიიღოს გამარტივებული პროცედურები ევროპულ ქვეყნებშიც. ამდენად სტატუსის ფორმალური მინიჭება შესაძლებელია არ იყოს რელევანტური იმის გათვალისწინებით, რომ ასეთი ხელშეკრულებები ჯერჯერობით არ არსებობს. ამდენად, „ოქროს სია“ დღეს უზრუნველყოფს ამ სერვისების მიღებას და თუ ჩვენ მომავალი წლისთვის მზად ვიქნებით სრულფასოვნად ავამოქმედოთ ეკონომიკური ოპერატორის სისტემა ისეთი სახით, როგორითაც ევროპაში მოქმედებს, ამ შემთხვევაში ჩვენ გადავადებას აღარ მოვითხოვთ“, - განაცხადა მამუკა ბარათაშვილმა.

შეგახსენებთ, რომ 2019 წელს ფინანსთა სამინისტრომ ბიზნესისთვის „ოქროს სიის“ შეღავათები გააუქმა. ამ გადაწყვეტილებით, ბიზნესს იმპორტის გადასახადის გადასახდელად ვადა 30 დღის ნაცვლად 5 დღე გაუხდა. აღსანიშნავია, რომ ყოფილი ფინანსთა მინისტრის ვანო მაჭავარიანის გადაწყვეტილებას ბიზნეს სექტორის წარმომადგენლების დიდი კრიტიკა მოჰყვა. „ოქროს სია“ საქართველოში 2009 წლიდან მოქმედებს და მასში გაწევრიანება მხოლოდ იმ კომპანიებს შეუძლიათ, რომელთა წლიური იმპორტი ან ექსპორტი 5 მლნ ლარს აღემატება. აღსანიშნავია, რომ „ოქროს სიის“ პრივილეგიებით 218 კომპანია სარგებლობდა.

ბაჩო ადამია