ბოლო 10 წელიწადში ინტერნეტშესყიდვების მოცულობა 20-ჯერ გაიზარდა. მკვეთრი ნახტომის მიზეზი Amazon.com-ის ან რომელიმე სხვა მსგავსი საიტის პოპულარობის ზრდა არ გამხდარა. 2020 წელს ბარათებით გადარიცხული 5.458 მლრდ ლარიდან 3.708 მლრდ, ანუ 67.9% ონლაინკაზინოების ანგარიშზე გადამისამართდა.
2011 წელს ბარათებით ინტერნეტშესყიდვების მოცულობამ 185 მლნ ლარი შეადგინა. 2020 წლის დეკემბერში, მხოლოდ 1 თვეში, კაზინოების ანგარიშზე 415 მლნ ლარი ჩაირიცხა.
თუ მხოლოდ ქართულ ვებგვერდებს განვიხილავთ, ტენდენცია უფრო გამოიკვეთება. 2020 წელს ბარათებით ქართულ ვებგვერდებზე სულ 77.2 მლნ ლარის გადახდა დაფიქსირდა, საიდანაც 58.6 მლნ აზარტაულ თამაშებზე მოდიოდა, გადახდილი 4.4 მლრდ-დან 3.6 მლრდ ასევე ონლაინკაზიონოების წილი აღმოჩნდა. ჯამში ტრანზაქციების 76% და გადახდილი თანხის 81% სამორინეების საკუთრება გახდა.
მდგომარეობა განსხვავებულია უცხოურ ვებგვერდებთან მიმართებაში, სადაც გადახდილი 1.040 მლრდ-დან კაზინოების წილმა 110 მლნ შეადგინა - 10.6%.
გასულ წელს სათამაშო ბიზნესი ის იშვიათი გამონაკლისი აღმოჩნდა, რომლის ბრუნვაც (დადებული ფსონების ჯამი) 22%-ით 31.7 მლრდ-მდე გაიზარდა. ეს თანხა ბარათებით გადარიცხულ 3.6 მლრდ-ს 9-ჯერ აღემატება, რასაც რამდენიმე ახსნა აქვს. წლის დასაწყისში 2 თვე კაზინოები ფიზიკურადაც ღია იყო, გარდა ამისა მოთამაშეები თანხას აპარატებიდანაც რიცხავენ და მოგებულ თანხასაც უკან აბრუნებენ.
2020 გამორჩეული იმით აღმოჩნდა, რომ კაზინოების შემოსავლები კრიზისის ფონზეც გაიზარდა, სხვა მხრივ დარგმა უბრალოდ სწრაფი ზრდა განაგრძო. თუ 2010-2020 წლებში ყველა ბიზნესის ბრუნვა 349%-ით 24.4 მლრდ-დან 109.6 მლრდ-მდე გაიზარდა, იმავე პერიოდში აზარტული თამაშების ბრუნვა 22 000%-ით 143 მლნ-დან 31.7 მლრდ-მდე გაიზარდა.
თუ მთელს ბიზნესში 2010 წელს აზარტული თამაშების წილი 0.59% იყო, 2015 წელს 6.23%-მდე გაიზარდა, 2020 წელს კი 28.9%-ს მიაღწია.
ბოლო წლებში ზოგიერთი პოლიტიკოსი პერიოდულად სათამაშო ბიზნესის შეზღუდვის ან სრული აკრძალვის ინიციატივით გამოდის. შეზღუდვის მომხრეები რეკლამის აკრძალვას, კაზინოენის ქალაქგარეთ გატანას იმ მოტივით ითხოვენ, რომ კონტროლი სუსტია. მათ პოზიციას ყველა არ იზიარებს. კაზინოების არსებობის მომხრეებს მიაჩნიათ, რომ აკრძალვა თამაშებს იატაკქვეშა სივრცეში გადაიტანს, რაც ფიზიკური ანგარიშწსწორების შემთხვევებს გაზრდის, ამავე დროს ქვეყანას საბიუჯეტო შემოსავლებსაც დააკლებს და ტურიზმსაც შეამცირებს.