ონლაინ ფასები მე-18 თვეა, რაც ზედიზედ იზრდება. Adobe-ის კვლევას CNN ავრცელებს.
„ონლაინ შოპინგი ადრე ეკონომიკის იმ ნაწილს წარმოადგენდა, სადაც ფასები სტაბილურად ეცემოდა, მაგრამ Covid-მა ეს შეცვალა,“ - იუწყება CNN.
ონლაინ ფასები, შარშანდელთან შედარებით, 3.5%-ით გაიზარდა, რაც ყველაზე დიდი 12-თვიანი ზრდაა მას შემდეგ, როცა 2014 წელს Adobe-მა ამ მეტრიკის კვლევა დაიწყო.
Adobe-ის მონაცემებით, ფასების ზრდა 18 კატეგორიიდან 11-ში დაფიქსირდა. სიის სათავეში ტანსაცმელია, რაზეც წინა წელთან შედარებით, ფასმა 17.3%-ით მოიმატა. კოვიდამდე ონლაინ ტანსაცმლის ფასები რეგულარულად ეცემოდა. 2015-დან 2019 წლამდე ონლაინ ტანსაცმლის ფასები წელიწადში, საშუალოდ, 1.1%-ით იკლებდა.
„ელექტრონულ კომერციაში რეკორდულად მაღალი ინფლაცია მიწოდების ჯაჭვის შეზღუდვებმა და მდგრადმა სამომხმარებლო მოთხოვნილებამ განაპირობა,“ - აცხადებს Adobe-ის ზრდის ანალიზისა და მარკეტინგის ვიცე-პრეზიდენტი, პატრიკ ბრაუნი.
Adobe-ის ციფრული ფასების ინდექსი აშშ-ში 100 მილიონზე მეტ პროდუქტს მოიცავს, დაწყებული შინაური ცხოველების პროდუქტებიდან და ურეცეპტოდ გაცემული წამლებით დამთავრებული. სადღესასწაულო ფასდაკლებების გამო, ონლაინ ფასები, წინა თვესთან შედარებით, 2%-ით დაეცა.
Adobe-ის მონაცემებით, ტანსაცმლის გარდა, ფასები გასულ წელთან შედარებით, მნიშვნელოვნად გაიზრდა სასურსათო პროდუქტებზე (3.9%-ით), სპორტულ საქონელზე (6.8%-ით), სახლის კეთილმოწყობის პროდუქციაზე (6.9%-ით) და ყვავილებზე (15.5%). ონლაინ სასურსათო პროდუქტებზე ფასები ზედიზედ 22 თვეა, იზრდება.
მაშინ, როცა ონლაინ ინფლაციამ გასულ თვეში რეკორდულ დონეს მიაღწია, ზოგიერთმა კატეგორიამ ფასების კლება განიცადა. მაგალითად, წინა წელთან შედარებით, ონლაინ სათამაშოებზე ფასები 2.9%-ით, ხოლო გასულ თვესთან შედარებით, 3.6%-ით დაეცა. Adobe-ის კვლევით, სათამაშოები, წიგნები და კომპიუტერები იმ გამორჩეულ კატეგორიებს წარმოადგენენ, რომლებიც ონლაინ შოპინგის დროს „მდგრადი და უფრო ძლიერი დეფლაციის“ ისტორიულ მოდელს მიჰყვებიან. ოფლაინ ფასების ზრდის გათვალისწინებით, სათამაშოების, კომპიუტერების, სპორტული საქონლისა და სხვა ნივთების ონლაინ შოპინგი ჯერ კიდევ იაფია.
CNN-ის ცნობით, ნოემბერში სამომხმარებლო ფასების 6,8%-ით ზრდა 1982 წლის მაისის შემდეგ, ყველაზე დიდ 12-თვიანი ზრდაა, რაც, ეკონომისტების პროგნოზებით, კიდევ უფრო დაჩქარდება.
BPN.GE