“OMV Petrom - ი გამარჯვებულია საქართველოს შავი ზღვის შელფზე ნავთობისა და გაზის ძიებისა და მოპოვების ტენდერში. ეს არის მნიშვნელოვანი ნაბიჯი საქართველოში ინვესტიციების ზრდისა და დივერსიფიკაციისკენ,“ - დატვიტა დღეს ავსტრიის ელჩმა საქართველოში არად ბენკომ და ამით უმსხვილესი ავსტრიული ენერგეტიკული ჰოლდინგის „OMV ჯგუფის“ წევრი კომპანიის OMV Petrom - ის მიერ ნავთობისა და გაზის რესურსებით სარგებლობის გენერალური ლიცენზიის მოსაპოვებლად შავი ზღვის II სალიცენზიო ბლოკზე ღია საერთაშორისო ტენდერში გამარჯვების ფაქტს გამოეხმაურა. ტენდერი საქართველოს ეკონომიკისა და მდგრადი განვითარების სამინისტროს ნავთობისა და გაზის სააგენტომ გამოაცხადა.

ტენდერში გამარჯვებული კომპანია, საწყის ეტაპზე, განახორციელებს სეისმოსაძიებო სამუშაოებს, ბოლო ეტაპზე კი დაიწყება ბურღვა. ბურღვის ეტაპის ღირებულება დამოკიდებულია კვლევების შედეგებზე. ანალოგიური პროექტის ღირებულება - რუმინეთის ტერიტორიულ წყლებში არსებული „დომინოს“ საბადოს აღმოჩენა, რომელიც ავსტრიულ OMV - ს უკავშირდება, 1,5 მლრდ აშშ დოლარია. საქართველო შავი ზღვის აუზის ქვეყნებიდან ერთადერთია, სადაც შელფურ ნაწილზე ნავთობისა და გაზის ძებნა-ძიება არ მიმდინარეობს.

აღსანიშნავია, რომ 2019 წლის Forbes -ს მონაცემებით „OMV ჯგუფი“ არის ავსტრიის მე-N2, ხოლო ევროპის მასშტაბით N79-ე უდიდესი კომპანია, ასევე მე-10 ევროპის ნავთობისა და გაზის კომპანიებს შორის. 2019 წელს კომპანიის აქტივებმა 44,1 მილიარდი ევრო შეადგინა.