„ალბათ პანდემია თუ ვინმემ ყველაზე მტკივნეულად გადაიტანა, ერთ-ერთი ჩვენ ვიყავით.  რეისები გაუქმდა, გაჩერდა ქუთაისის აეროპორტი და ჩვენი ბრუნვა ფაქტობრივად 99%-ით დაეცა, გარდა რაღაც ინდივიდუალური შეკვეთებისა, რაც ზღვაში წვეთია. ახლა დაპაუზებულია მუშაობა, 4 ოქტომბრიდან დავიწყეთ პირველი რეისი.  ქუთაისში ფრენების ეტაპობრივი აღდგენა იწყება, ოღონდ ძალიან ცოტა სიხშირით - კვირაში 1 ფრენა, რაც ბიზნესისთვის არაფერს ნიშნავს,“ - თბილისიდან ქუთაისის მიმართულებით მგზავრების გადაყვანა კომპანია „ომნიბუსმა“ ერთი რეისის გამო განაახლა.

 „ომნიბუს ექსპრესი“ ესაა კომპანია , რომელსაც ომნიბუსებით(შატლებით) თბილისიდან ქუთაისის აეროპორტის მიმართულებით მგზავრები უკვე სამი წელია გადაჰყავს.  კომპანიამ სატრანსპორტო სფეროში საქმიანობა 2008 წელს ერთი ავტობუსით დაიწყო, თუმცა სხვა მიმართულებებით, იყო ტურისტული მიმართულებაც. რამდენიმე დღის წინ კი „ომნიბუსმა“ განაახლა მუშაობა, მას შემდეგ, რაც ქუთაისის აეროპორტს რიგის მიმართულებით ერთი რეისი  დაემატა. კომპანიის  40 ავტობუსიდან ახლა მხოლოდ ერთი მუშაობს.  

რეისების გაუქმების გამო, კომპანია ზარალზეა და „კომერსანტთან“ საუბარში აღნიშნეს, რომ თუ ფრენები არ განახლდება, რამდენიმე თვეში 12 წლიანი საქმიანობის შემდეგ „ომნიბუსი“ დაიხურება.

„შარშან ამ პერიოდში თვის განმავლობაში 280 ფრენა იყო ქუთაისის აეროპორტიდან,  ახლა არის 4. მუშაობას ვიწყებთ მომავლის იმედით, რომ შემდეგ თვეში რამდენიმე რეისი კიდევ დაემატება, თუმცა ეს ცოტა ბრუნვაც წამგებიანია.

ერთადერთი შეღავათი რაც გვქონდა, ეს არის ის რომ ბანკებთან ურთიერთობები დავალაგეთ და მოხდა  კრედიტების გადავადება და ახლა თანხას არ ვიხდით. მაქსიმალურად ვცდილობთ, რომ გავუძლოთ სანამ შევძლებთ, თუმცა ყველაფერს თავისი ლიმიტი აქვს. თუ ახლა არ წამოგვეწია სამუშაოები, რამდენიმე თვეში ჩვენც საბოლოოდ გავჩერდებით.

ქუთაისის აეროპორტისთვის სტაბლურად ყოველდღე 8 ავტობუსი მუშაობდა. სულ 40 გვყავს სხვადასხვა მიმართულებით. აქედან ჯერ მხოლოდ ერთი იწყებს მოძრაობას.

თუ რეისები დაგვემატა, როგორც იგეგმება ოქტომბერი-ნოემბრიდან, მერე ალბათ შეიძლება დატვირთვის 10%-მდე მაინც ავიდეთ,“ — ამბობს კომპანია „ომნიბუსის“ დირექტორი, ირაკლი კაბულაშვილი.

ქუთაისის აეროპორტის მიმართულებით მგზავრების გადაყვანა „ომნიბუს ექსპრესმა“  2018 წლიდან დაიწყო. „ომნიბუსის“  მომსახურებით სარგებლობენ არა მხოლოდ  შემომყვანი ტურისტული კომპანიები, არამედ სამთავრობო თუ არასამთავრობო ორგანიზაციები, დელეგაციები, ადგილობრივი და საერთაშორისო კომპანიები.

მარიამ მორგოშია