ბოლო პერიოდში, ყველასთვის მოულოდნელად, უკრაინას და რუსეთს შორის ეკონომიკურმა თანამშრომლობამ ისევ ზრდა დაიწყო. თანაც, ამა წლის პირველი კვარტლის ბოლოს ექსპორტი უკრაინიდან რუსეთში 24,8%-ით ($267 მლნ), ხოლო იმპორტი რუსეთიდან - 3,5%-ით, 1,2 მლრდ. დოლარამდე გაიზარდა.
საბოლოო ჯამში, 2021 წლის პირველი 4 თვის მანძილზე უკრაინის იმპორტმა რუსეთიდან $1,6 მლრდ, ხოლო ექსპორტმა $915 მლნ შეადგინა, შესაბამისად, უარყოფითი ბალანსი $721 მლნ–ს შეადგენს.
ეს ტენდენცია რუსეთის პრეზიდენტის ადმინისტრაციაში უკრაინის საკითხების კურატორს დმიტრი კოზაკს ძალიან მოსწონს - განსაკუთრებით კი მან ხაზი იმას გაუსვა, რომ ვაჭრობის რეალური მასშტაბები განვლილი პერიოდში $2,4 მლრდ–ს შეადგენს, რაც უკრაინულ სტატისტიკას $400 მლნ-ით აღემატება.
„პოროშენკოს და შემდეგ კი ზელენსკის მიერ შემოღებული სანქციების მიუხედავად, თანამშრომლობა ღრმავდება და რუსეთის ექსპორტი უკრაინაში 2019 წელთან შედარებით არათუ შემცირდა, არამედ 1,5%-ით გაიზარდა“, - ვერ მალავს კმაყოფილებას დმიტრი კოზაკი.
სავარაუდოდ, ამ შემთხვევაში რუსული სტატისტიკა უფრო სანდოა, რადგანაც უკრაინულ საბაჟოზე კონტრაბანდის პრობლემა დღესაც სერიოზულად დგას. ამდენად, როგორ ჩანს, რუსეთმა უკრაინის სავაჭრო პარტნიორებს შორის პოზიციები არათუ დათმო, არამდე გაიუმჯობესა - მესამედან მეორე ადგილზე გადაინაცვლა.
რით ვაჭრობენ ერთმანეთთან რუსეთი და უკრაინა? პირველ რიგში, რა თქმა უნდა, მთავარი საქონელი ენერგორესურებია - სწორედ მათზე მოდის რუსეთის დადებითი სავაჭრო ბალანსის დიდი ნაწილი და ეს რეალობა, სავარაუდოდ, კიდევ დიდხანს არ შეიცვლება.
თუმცა, ქვეყნებს შორის ვაჭრობა მხოლოდ ნავთობით და გაზით არ შემოიფარგლება - რუსეთი უკრაინაში სხვადასხვა ბურღულეულების მთავარი მიმწოდებელია. მაგალითად, წიწიბურის ექსპორტი 46% - ანუ, $3,2 მლნ სწორედ რუსეთზე მოდის.
რუსეთს უკრაინაში ასევე მრავალი დასახელების ქიმიური პროდუქცია შეაქვს - ცარცი, კალციუმის ფოსფატი, გრანიტი, ბაზალტი, აზბესტი, ამიაკი. რუსეთზე ასევე მოდის უკრაინაში რეალიზებადი ლაქების 32%, სამუხრუჭე სითხეების 17%, ცელულოზის 67%, საგაზეთო ქაღალდის 92,5%, წიგნების 36%.
რუსეთი ასევე შედის უკრაინული პროდუქციის უმსხვილეს მყიდველთა სამეულში - თუმცა, საექსპორტო საქონლის ჩამონათვალი მკვეთრად შეიცვალა - 2014 წლამდე უკრაინა რუსეთში დიდი რაოდენობით ყველს, კარაქს, საკონდიტრო პროდუქციას, კონსერვებს, ბოსტნეულს და კვების სხვა პროდუქტებს ყიდდა.
დღეს ამ ექსპორტისგან თითქმის არაფერია დარჩენილი - აგრარული პროდუქციის საექსპორტო ჩამონათვალიდან მხოლოდ რამდენიმე მიმართულება დარჩა. მაგალითად, ბულგარული წიწაკა, რომელიც ძალიან მცირე რაოდენობით იყიდება - 2021 წლის 4 თვის მანძილზე მხოლოდ 30 000 დოლარის. შესაბამისად, დღეს უკვე არა უკრაინა ყიდის რუსეთში სასურსათო საქონელს, როგორც ეს ადრე იყო, არამედ პირიქით - რუსეთი უკრაინაში.
გარდა ამის, უკრაინა რუსეთში ისეთ საქონელს აგზავნის, როგორცაა თამბაქოს ნაწარმი (ექსპორტის 35%), გოგირდი (42%), კვარცი (35%), მანგანუმი (14%), ტიტანი (16%), მედიკამენტები (21%).
უკრაინა ასევე რუსეთში სამშენებლო მასალებს ყიდის - ლაქ–საღებავებს, ფითხი, ასევე კოსმეტიკას, შესაფუთ მასალებს, ქსოვილებს, ძაფებს, ტანსაცმელს, ხალიჩებს და ა.შ.
რუსეთი უკრაინისთვის კრიტიკულად მნიშვნელოვანია, როგორ მაღალტექნოლოგიური პროდუქციის მყიდველი - საუბარი საქონელზე, რომელის არასაკმარისად თანამედროვეა ევროპისთვის, მაგრამ მისაღებია რუსეთისთვის - მიკროსკოპები, ავტომატური რეგულირების დანადგარები, სტომატოლოგიური აღჭურვილობა, აზომვითი ხელსაწყოები, რენტგენის აპარატები, ატომური რეაქტორები, ქვაბები და ა.შ.
თუმცა, რუსეთში უკრაინული ექსპორტის ყველაზე მსხვილი საქონელია შავი ლითონები - ეს მაჩვენებელი პირველ კვარტალში 50%-ით, თითქმის $148 მლნ–მდე გაიზარდა.
წყარო: strana.ua