Microsoft Corp კიდევ ერთი ტექნოლოგიური გიგანტია, რომელიც ლას-ვეგასში დაგეგმილ 2022 წლის Consumer Electronics Show-ში (CES) მონაწილეობას არ მიიღებს. ინფორმაციას Reuters ავრცელებს.
ამით Microsoft იმ კომპანიების სიას შეუერთდა, რომლებმაც, ომიკრონ შტამის სწრაფად გავრცელების გამო, გადაწყვიტეს, არ იყვნენ ფიზიკურად წარმოდგენილი მომდევნო თვის ღონისძიებაზე. გავრცელებულ განცხადებაში აშშ-ს პროგრამული უზრუნველყოფის გიგანტი აზუსტებს, რომ ის CES-ში მონაწილეობას დისტანციურად მიიღებს.
კომპანიებმა, მათ შორის ამერიკულმა ავტომწარმოებელმა, General Motors-მა, Alphabet Google-მა და მისმა უპილოტო ავტომობილების მწარმოებელმა კომპანია Waymo-მ, ასევე, Facebook-ის მშობელმა კომპანია Meta Platforms-მა, Twitter-მა, Lenovo Group-მა, AT&T-მ და Amazon-მა შოუში პერსონალურ მონაწილეობაზე უარი წინა კვირას განაცხადეს.
CES-ის ოფიციალური პირების ინფორმაციით, ღონისძიება კვლავ 5-8 იანვარს, „უსაფრთხოების მკაცრი ზომების დაცვით“ გაიმართება, რაც ვაქცინაციის მოთხოვნას, ნიღბების ტარებასა და კოვიდტესტებზე ხელმისაწვდომობას გულისხმობს.
bpn.ge