ანგელა მერკელის 16-წლიანი მმართველობის შემდეგ, ბუნდესტაგმა ოლაფ შოლცი ახალ კანცლერად აირჩია. მას მხარი 395-მა დეპუტატმა დაუჭირა, 303 კი წინააღმდეგი წავიდა. 63 წლის შოლცი სოციალ-დემოკრატიული პარტიის თავმჯდომარეა. კოალიციაში მწვანეებიც არიან გაწევრიანებულნი.
კანცლერობამდე შოლცი, 1998 წლიდან მოყოლებული, სხვადასხვა დროს ბუნდესტაგის წევრის, შრომის მინისტრის, ფინანსთა მინისტრის და ჰამბურგის მერის პოსტებს იკავებდა. ახალმა კანცლერმა მთავარ გამოწვევად კორონავირუსი დაასახელა, თუმცა ასევე ვრცლად ისაუბრა რუსეთის მიერ უკრაინაში შესაძლო შეჭრაზე.
შოლცამდე გერმანიას 16 წელი ქრისტიან-დემოკრატი ანგელა მერკელი მართავდა. მერკელის დროს, გერმანიაში მუდმივ ფასებში დათვლილი შემოსავალი 1 სულ მოსახლეზე $35 300-დან $41 300-მდე გაიზარდა, 2019 წელს კოვიდამდე პერიოდში $43 300-ს აჭარბებდა. ისევე როგორც მთელს მსოფლიოში გერმანიაშიც ქარისა და მზის ენერგიის წილი ელექტროენერგიის გენერაციაში მნიშვნელოვნად გაიზარდა, თუმცა 2020 წლის გეგმა რომლის მიხედვითაც ქვეყანაში 1 მლნ ელექტრომობილს უნდა ემოძრავა, მხოლოდ 70%-ით შესრულდა.
ეკონომიკური წარმატებების პარალელურად მერკელის საგარეო პოლიტიკური კურსი ბევრ კითხვას ბადებდა. 2008 წელს გერმანიამ საქართველო MAP-ის მინიჭებაზე უარი განუცხადა. მერკელის დროს დაიწყო და პრაქტიკულად დასრულდა „ჩრდილოეთი ნაკადი 2“-ის მშენებლობა, რაც ერთის მხრივ უკრაინას სატრანზიტო ფუნქციას ართმევს, მეორეს მხრივ ევროპის რუსეთზე ენერგოდამოკიდებულებას კიდევ უფრო ზრდის. მილსადენის გამტარუნარიანობა 55 მლრდ კუბური მეტრია, რაც საქართველოს წლიურ მოხმარებას 20-ჯერ აღემატება. ტრამპის ადმინისტრაციის მიერ ამოქმედებული სანქციები, ბაიდენმა გააუქმა.
$3.846 ტრლნ-იანი მშპ-თი გერმანია მსოფლიოს #4 და ევროპის #1 ეკონომიკად რჩება. ერთ სულ მოსახლეზე შემოსავლით მას ევროპიდან სკანდინავიის ქვეყნების, ირლანდია, შვეიცარია და ნიდერლანდები უსწრებენ. ადამიანური განვითარების ინდექსის მიხედვით, რაც შემოსავლებთან ერთად განათლებასა და ჯანმრთელობასაც ითვალისწინებს გერმანია ნორვეგიის, ირლანდიის, შვეიცარიის, ჰონკონგისა და ისლანდიის შემდეგ მეექვსე ადგილს იკავებს.