აფხაზეთში კორონავირუსის ეპიდემიით გამოწვეული მდგომარეობა უკვე კრიტიკულია. ბოლო კვირის განმავლობაში ყოველდღე დაახლოებით 100 ახალი შემთხვევა ფიქსირდება. დე ფაქტო ხელისუფლება პირდაპირ აცხადებს, რომ საავადმყოფოებში თავისუფალი ადგილები აღარ დარჩა და დაჩქარებული ტემპებით ატარებენ რემონტს სხვადასხვა სამედიცინო ნაწესებულებებში ახალი ბოქსირებული განყოფილებების შესაქმნელად. ამ ყველაფერს კი ისიც დაემატა, რომ „რესპუბლიკაში არსებული ერთადერთი კომპიუტერული ტომოგრაფი გაფუჭდა და ახლა რუსეთიდან ელოდებიან ხელოსანს, რომელიც მის შეკეთებას შეძლებს.
მოსახლეობაში პანიკური განწყობები იზრდება. ინტერნეტში ჩატარებული გამოკითხვებით, მოსახლეობის 70% დაუყოვნებლივ ითხოვს მკაცრი შეზღუდვების შემოღებას.
აფხაზეთის ე.წ. ჯანდაცვის სამინისტროს მიერ 10 ოქტომბერს გამოქვეყნებული მონაცემების თანახმად, კოვიდ-19-ის პანდემიის დაწყებიდან დე ფაქტო რესპუბლიკაში კორონავირუსით 2257 ადამიანი დაინფიცირდა, რომელთა შორის 21 გარდაიცვალა, ხოლო 829 კი გამოჯანმრთელდა.
ოქტომბერში აფხაზეთის სეპარატისტულ რესპუბლიკაში ვირუსით ინფიცირებულთა რაოდენობამ რეკორდულად დაიწყო ზრდა.
6 ოქტომბერს პანდემიის დაწყებიდან პირველად დაფიქსირდა სამნიშნა რიცხვი - 103 ახალი შემთხვევა.
7 ოქტომბრის მონაცემებით „რესპუბლიკაში კორონავირუსით დაავადებულთა რაოდენობამ 108-ს მიაღწია, 8 ოქტომბერს 95 ახალი შემთხვევა დაფიქსირდა, 9 ოქტომბერს - 99, ხოლო 10 ოქტომბერს კი - 87. ამის შესახებ დე ფაქტო ჯანდაცვის სამინისტროს „ფეისბუქ გვერდზე გამოქვეყნებული მონაცემები იუწყება.
გუდაუთას ჰოსპიტალში განთავსებული პაციენტების მკურნალობის პროცესი კიდევ უფრო გართულდა მას შემდეგ, რაც 9 ოქტომბერს კომპიუტერული ტომოგრაფიის აპარატი გაფუჭდა.
აფხაზეთის „ჯანდაცვის სამინისტროს ფარმაციის დეპარტამენტის უფროსმა, აჰრა აჯბამ „სპუტნიკთან ინტერვიუში განაცხადა, რომ 2 სექტემბერს ბიზნესმენთა გაერთიანების მიერ ჰოსპიტალისთვის გადაცემული კოპიუტერული ტომოგრაფიის აპარატი ამუშავებიდან რამდენიმე დღეში გამოვიდა მწყობრიდან.
აჯბას განმარტებით, ამჟამად საავადმყოფოში სხვა კომპიუტერული ტომოგრაფი არ აქვთ, მაგრამ მის ფუნქციას გადასატანი რენტგენის აპარატი ასრულებს. პრობლემას ისიც ამძიმებს, რომ აფხაზეთში შესაბამისი სპეციალისტიც არ ჰყავთ, რომელიც ტომოგრაფის შეკეთებას შეძლებს. ამიტომაც მოუთმენლად ელოდებიან ხელოსანს რუსეთიდან, რომელიც სავარაუდოდ ორშაბათს ჩავა.
ერთ-ერთი მთავარ პრობლემად სეპარატისტულ რესპუბლიკაში ითვლება ის, რომ კოვიდ-19-ით დაავადებულთა რაოდენობის ზრდის გამო აფხაზეთში არ ჰყოფნით ადგილები, რათა პაციენტები საავადმყოფოებში გადაანაწილონ სამკურნალოდ.
აფხაზეთში 1 აგვისტოს რუსეთთან „საზღვრის გახსნის შემდეგ ახალი კორონავირუსით დაავადებულთა რიცხვმა საგრძნობლად მოიმატა.
აღსანიშნავია, რომ რუსეთთან „საზღვრის გახსნას არაერთგავროვან რეაქცია მოჰყვა და ე.წ. ჯანდაცვის სამინისტრომ დაავადებული ტურისტების სამშობლოში დაბრუნების გადაწყვეტილება მიიღო.
ე.წ. მინისტრმა, თამაზ ცახნაკიამ აგვისტოში განაცხადა, რომ რუსეთიდან ჩამოსულ დამსვენებლებ აფხაზეთის დე ფაქტო რესპუბლიკაში მხოლოდ პირველადი დახმარება გაეწევათ, რადგან ვერ მოხერხდება პაციენტების დიდი ნაკადისთვის დროული დახმარების გაწევა.
დე ფაქტო რესპუბლიკის „პრეზიდენტის, ასლან ბჟანიას განკარგულებით, ინფიცირებულთა მომატებული რაოდენობის ფონზე საკოორდინაციო შტაბმა შექმნა დამატებითი ბლოკები, რომელიც რაიონულ საავადმყოფოებში მოემსახურებიან დაავადებულებს.
გაგრის რაიონულმა ჰოსპიტალში უკვე დაასრულა ახალი ბლოკის შესაქმნელად დაწყებული სარემონტო სამუშაოები. ჰოსპიტალში კორონავირუსით ინფიცირებული დამატებით 20 პაციენტის მიღებას შეძლებენ.
გარდა ამისა, 12-13 ოქტომბერს სარემონტო სამუშაოები დასრულდება სოხუმის ინფექციურ საავადმყოფოში, სადაც ახალ ბლოკში 30 დამატებითი ადგილი იქნება კოვიდ-19-ით დაავადებულთათვის.
resonancedaily.com
აფხაზეთი
