ცხოველების კომბინირებული საკვების მწარმოებელი უმსხვილესი კომპანია საქართველოში „ნუტრიმაქსი“ ახალ ქარხანას ააშენებს. კომპანიის წარმომადგენელმა რევაზ ლაფაჩმა „კომერსანტს“ უთხრა, რომ სამომავლოდ თევზის სანაშენე მეურნეობების კომბინირებული საკვებით მოამარაგებას გეგმავენ, რომლებიც დღეს ამ პროდუქტის დეფიციტს განიცდიან.
„ადგილობრივ ბაზარზე თევზის საკვების დიდი საჭიროებაა. სამწუხაროდ, დღეს ბევრი ექსტენსიური მეურნეობაა, რომელიც კომბინირებულ საკვებს საერთოდ არ იყენებს, ამიტომ ვგეგმავთ, კიდევ უფრო მეტი პოტენციალი შევქმნათ და შევამციროთ იმპორტი. დასაწყისისთვის, ბაზრის 25-30%–ის ათვისებას შევძლებთ და ამ მაჩვენებელს ნელ-ნელა გავზრდით. ინდუისტრია, რომელიც შექმნის თევზის საკვებს, რომელშიც იქნება ინგრედიენტი თევზის ფქვილი, თევზის ნარჩენწარმოება, არც არის საქართველოში. გვინდა პირველები გავხდეთ!“, - აცახდებს ლაფაჩი.
მისივე ინფორმაციით, ქარხნის მშენებლობა 2022 წელს იგეგმება. პროექტის განხორციელების შემთხვევაში, ქარხანას შეასძლებლობა ექნება, ბაზარი 1500-2000 ტონა საკვებით მოამარაგოს. სავარაუდო ინვესტიცია 2,5 მლნ ევროს ფარგლებშია.
„საინვესტიციო თანხის მოცულობა არის ცვლადი. საბოლოდ დასაზუსტებელია, როგორი დანადგარის ყიდვა მოგვიწევს - ევროპულის თუ ჩინურის. არის მეორადი ტექნიკის ბაზარიც, ფართო არჩევანია, ძიების პროცესში ვართ. ვარჩევთ ასევე ტერიტორიასაც, სადაც უნდა განთავსდეს ქარხანა“, - მოგვითხრობს რევაზ ლაფაჩი.
რაც შეეხება საწარმოო პროცესზე პანდემიის გავლენას, როგორც რევაზ ლაფაჩი ამბობს, ამან კონკრეტულად ამ ბიზნესზე დადებითად იმოქმედა, რადგან ცხოველის საკვების მიმართ მოთხოვნა გაიზრდა.
„მიუხედავად იმისა, რომ პანდემია ზოგადად ცუდად მოქმედებდა ბიზნესზე, სტრესული გარემო იყო და რამდენიმე დიდი წარმოება გაჩერდა კიდეც, მთლიანობაში ცხოველთა კვების ბაზარი განვითარდა. ჩვენ შემთხვევაში, 35%-იანი ზრდა გვაქვს. ეს გამოწვეულია ადამაინების გასვლით რეგიონებში. პანდემიისას ვიღაცამ ქათამი გაიჩინა, ვიღაცამ ბოცვერი, ძროხა და ასე თანდათან კომბინირებულ საკვებზე მოთხოვნა გაგვეზარდა“, - ამბობს ლაფაჩი.
„ნუტრიმაქსი“ დაარსდა 2009 წელს და ის პირველი კომპანიაა საქართველოში, რომელიც ცხოველთა და ფრინველთა საკვებს ინდუსტრიულად აწარმოებს.
კომპანიის მისიაა მაღალხარისხიანი პროდუქციის, თანამედროვე ტექნოლოგიებისა და კვალიფიციური კონსულტაციების მიწოდების საშუალებით, განავითაროს ფერმერული მეურნეობები საქართველოში. კომპანია დაარსების დღიდან ჰოლანდიური მსხვილი ჰოლდინგის წევრის — Trouw Nutrition Hifeed- ის ოფიციალური პარტნიორია, რომელსაც ცხოველთა საკვების, აუცილებელი პრემიქსებისა და მინერალების წარმოებაში მსოფლიოში ლიდერის პოზიცია უკავია.
მარი ჩიტაია