ნორვეგიის პოლიციამ დააკავა ქვეყნის ერთ-ერთი უმდიდრესი ადამიანი, ტომ ჰაგენი, რომლის ცოლიც წელიწადნახევრის წინ გაუჩინარდა. გამოცემა NRK-ს ცნობით, ჰაგენს შესაძლოა ცოლის მკვლელობასთან ჰქონდეს კავშირი.

ბიზნესმენს მკვლელობასთან კავშირის გამო ბრალი უკვე წაუყენეს. უახლოეს დღეებში პოლიცია მისთვის წინასწარ პატიმრობას მოითხოვს.

68 წლის ანა-ელიზაბეთ ფალკევიკი ოსლოს გარეუბანში 2018 წლის ოქტომბერში გაუჩინარდა. ქალის ძებნა მალევე დაიწყო, თუმცა ინფორმაცია ამის შესახებ მხოლოდ 3 თვის შემდეგ გასაჯაროვდა. პოლიციაში მაშინ განაცხადეს, რომ ფალკევიკი გაიტაცეს. ქალის სახლში იპოვეს წერილი, რომელშიც გამტაცებლები კრიპტოვალუტაში 9 მილიონი ევროს გადახდას ითხოვდნენ.

2019 წლის ივლისში პოლიციამ განაცხადა, რომ ფალკევიკი, სავარაუდოდ, ცოცხალი აღარაა, ვინაიდან სავარაუდო გამტაცებლები კონტაქტზე აღარ გამოდიოდნენ.

პოლიციაში ჯერჯერობით არ საუბრობენ, რა კავშირი აქვს ჰაგენს მკვლელობასთან, და აცხადებენ, რომ გამოძიება ჯერჯერობით დაწყებით სტადიაზეა.

69 წლის ტომ ჰაგენის ქონება დაახლოებით 1,7 მილიარდ ნორვეგიულ კრონას (150 მილიონ ევროს) შეადგენს. მისი დაფუძნებული კომპანია Elkraft AS ელექტროენერგიის ერთ-ერთი უმსხვილესი მიმწოდებელია.

Imedinews.ge