იურიდიული კომპანია „BLB“ (ბიელბი) - ს მიერ, 24 იანვარს გავრცელებული დამატებითი ინფორმაციის თანახმად, ნონა გაფრინდაშვილი Netflix–ის წინააღმდეგ“ საქმეზე კალიფორნიის შტატის მოსამართლე ვირჯინია ფილიპი, გადაწყვეტილებას გამოაქვეყნებს მხარეთა დამატებითი ზეპირი ახსნა-განმარტების მოსმენის გარეშე, რაც იმას ნიშნავს რომ მოსამართლემ საკმარისად მიიჩნია, სასამართლოსთვის უკვე წარდგენილი დოკუმენტები და არგუმენტები.
როგორც იურიდიული კომპანიის პარტნიორი და ნონა გაფრინდაშვილის ერთ-ერთი ადვოკატი მაია მწარიაშვილი განმარტავს - „ახლა უკვე ველოდებით სასამართლოს წერილობით გადაწყვეტილებას გონივრულ ვადაში, ჩვენი მოლოდინია რომ Netflix ვერ დაიცავს თავს გამოხატვის თავისუფლებით.“
შეგახსენებთ, რომ ქართველი მოჭადრაკე ნონა გაფრინდაშვილი, მსოფლიოს ხუთგზის ჩემპიონი, პირველი ქალი მოჭადრაკე, რომელმაც ვაჟთა შორის დიდოსტატის წოდება მოიპოვა, უმსხვილეს სტრიმინგს Netflix-ს მის მიმართ შეურაცხმყოფელი, ცრუ ინფორმაციის გავრცელებისთვის ედავება. საქმე ეხება სერიალ „ლაზიერის გამბიტს“ (The Queen’s Gambit), რომლის კულმინაციურ ეპიზოდში, ჭადრაკის დიდოსტატის უმნიშვნელოვანესი კარიერული მიღწევის შესახებ მიზანმიმართულად გაჟღერდა ცრუ ინფორმაცია, რომ მას მამაკაც მოჭადრაკეებთან არასდროს უთამაშია; ამავდროულად სერიალში იგი მოხსენიებულია, როგორც რუსი მოჭადრაკე (ცნობისთვის, Netflix უმსხვილესი სტრიმინგ და მედია მაგნატია, რომლის წლიურმა შემოსავალმა 2021 წელია 28 მილიარდ აშშ დოლარზე მეტი შეადგინა).
Netflix-მა გამოხატვის თავისუფლებაზე დაყრდნობით სამართალწარმოების შეწყვეტის შუამდგომლობა დააყენა, თუმცა ნონა გაფრინდაშვილი უფლებების დაცვისთვის ბრძოლას განაგრძობს.
პროცესის მიმდინარეობისას დაიკითხა სერიალის სცენარისტი და პროდიუსერი სკოტ ფრენკ - (ცნობილი რეჟისორი, სცენარისტი და პროდიუსერი, რომლის ნაშრომები მრავალჯერ არის წარდგენილი ოსკარსა და ემიზე, მისი რეჟისორობით Netflix-მა გადაიღო ასევე ცნობილი მინისერიალი “Godless”). ქ-ნი ნონა გაფრინდაშვილის ადვოკატების განმარტებით, Სკოტ ფრენკი იძულებული გახდა ეღიარებინა, რომ იცოდა სიმართლე ლეგენდარული მოჭადრაკის კარიერული მიღწევების შესახებ - ამგვარი აღიარება ადასტურებს Netflix-ის მიერ მცდარი ფაქტების მიზანმიმართულად გავრცელებას.
უდავო ფაქტია, რომ ნონა გაფრინდაშვილი 1950-იანი წლების ბოლოდან წარმატებით ასპარეზობდა მამაკაცთა ტურნირებზე საბჭოთა კავშირის მასშტაბით და 1960-იანი წლებიდან მონაწილეობს და იგებს პრესტიჟულ საერთაშორისო მამაკაცთა ტურნირებს.