2022 წლის ნოემბერში საერთაშორისო მოგზაურობიდან შემოსავლების ზრდამ 2019 წლის დონეს 51%-ით გადააჭარბა, - ამის შესახებ „თიბისი კაპიტალის“ ტურიზმის ბაზრის კვლევაშია აღნიშნული.
კვლევის მიხედვით, საგრძნობლად გაიზარდა მეზობელი ქვეყნების წილი საერთაშორისო მოგზაურობის შემოსავლებში და 58%-ს მიაღწია, რაც 2022 წლის ნოემბერში პანდემიამდელ დონეს 6 პროცენტით აჭარბებს. ასეთი განსხვავების მთავარი მიზეზი რუსეთის წილის მნიშვნელოვანი ზრდაა.
სომხეთი და აზერბაიჯანი კვლავ მნიშვნელოვნად ჩამორჩებიან პანდემიამდელ დონეს, ხოლო შემოსავლები თურქი ვიზიტორებიდან თითქმის უტოლდება 2019 წლის დონეს.
უკრაინის წილი საერთაშორისო მოგზაურობის შემოსავლებში კვლავ აჭარბებს პანდემიამდელ დონეს. ისრაელის ტურისტებისგან მიღებული შემოსავლების წილი კი ოდნავ ჩამორჩება 2019 წელს.
ევროკავშირის წილი საერთაშორისო მოგზაურობის შემოსავლებში 2019 წლის მაჩვენებელს ჩამორჩება და 6%-ს შეადგენს.
2022 წლის ნოემბერში საუდის არაბეთის წილმა გადააჭარბა პანდემიამდელ დონეს და შეადგინა 1%.
რაც შეეხება სასტუმროებს, 2022 წლის 11 თვეში, სასტუმროების საშუალო დატვირთულობამ 51% შეადგინა და 2019 წლის საშუალო მაჩვენებელს 4 პროცენტული პუნქტით გადააჭარბა, რაც განპირობებული იყო: ტურისტული ვიზიტების აღდგენით, საქართველოში დარჩენის ხანგრძლივობის ზრდით (4-დან 6 ღამემდე) და აქტიური შიდა ტურიზმით. 2022 წლის 11 თვეში, დიდ სასტუმროებში საშუალო დღიურმა ფასმა $111 შეადგინა, რაც 2019 წლის ფასს 10%-ით ჩამორჩება. 2023 წელს დიდ სასტუმროებში მოსალოდნელი საშუალო დღიური ფასი $124-ია.