2020 წლის ივლისში, წინა წლის ანალოგიურ პერიოდთან შედარებით საქართველოში ფულადი გზავნილების რაოდენობა 22.1%-ით გაიზარდა. უცხოეთიდან საქართველოში ფულადი გზავნილების 94.6% იმ 18 უმსხვილეს პარტნიორ ქვეყანაზე მოდის, საიდანაც ასეთი გზავნილების მოცულობამ ივლისში 1 მლნ აშშ დოლარს გადააჭარბა. იმავე 18 ქვეყანაზე გასული წლის ივლისში მთელი ფულადი გზავნილების 93.4% მოდიოდა.

ფულადი გზავნილების ზრდის ტენდენციის მიუხედავად, ეკონომიკის ექსპერტების ნაწილი თვლის, რომ ნოემბერში ეს მაჩვენებელი ისევ შემცირდება. „კომერსანტთან“ საუბრისას ეკონომიკის ექსპერტმა ნიკა შენგელიამ აღნიშნა, რომ გზავნილების ნაკადების ზრდა ქვეყანაში არსებულმა ეკონომიკურმა კრიზისმა გამოიწვია.

„ფულადი გზავნილების ზრდა უკავშირდება იმას, რომ ქვეყანაში გაჭირვებაა და ნათესავები გაზრდილ ტრანზაქციებს აკეთებენ. სავარაუდოდ სექტემბერ-ოქტომბერშიც იგივე სიტუაცია იქნება, მაგრამ ვფიქრობთ ნოემბერში ეს ტრანზაქციები შემცირდება. ჩვენ ძირითადი ჩარიცხვები რუსეთიდან  და საბერძნეთიდან გვაქვს. გამომდინარე იქიდან, რომ სამსახურებისა და ზოგადად ეკონომიკის მხრივ, ნოემბრის თვეში თვითონ ამ ქვეყნებშიც პრობლემები შეიქმნება, ვფიქრობთ, დღევანდელთან შედარებით ფულადი გზავნილების ნაკადებიც დაიკლებს“, - განაცხადა ნიკა შენგელიამ.

ექსპერტების პროგნოზის მიუხედავად, საქართველოს ეროვნული ბანკის პრეზიდენტი კობა გვენეტაძე ვარაუდობს, რომ ფულადი გზავნილების ზრდის ტენდენცია გაგრძელდება და შეზღუდვების შემსუბუქების შემდეგ დაგროვილი გზავნილების გამოგზავნა მომდევნო თვეებშიც მოხდება. 

„ფულადი გზავნილების ზრდის ტენდენცია გრძელდება. ივნისში 17.8%-ით ზრდის შემდეგ, ივლისში წლიური ზრდა 22.1% იყო. თუმცა, გასათვალისწინებელია, რომ პანდემიამდე ფულადი გზავნილების გარკვეული ნაწილი (საბანკო გზავნილების დაახლოებით 8%) საქართველოში არასაბანკო არხებით, ვიზიტორების მეშვეობით, შემოდიოდა. საერთაშორისო მოგზაურობის შეზღუდვის გამო, გზავნილების ამ ნაწილმა საბანკო არხებში გადაინაცვლა და, შედეგად, ფულადი გზავნილების აღნიშნულ ზრდაშიც შეიტანა წვლილი. გარდა ამისა, პანდემიის საწყის ეტაპზე არსებული შეზღუდვები, სავარაუდოდ, გზავნილებზეც მოქმედებდა. ამ შეზღუდვების შემსუბუქების შემდეგ დაგროვილი გზავნილების გამოგზავნა მომდევნო თვეებში მოხდა, რამაც ასევე იმოქმედა ივნის-ივლისში გზავნილების ზრდის მაჩვენებლებზე. მიუხედავად ზემოაღნიშნულისა, ამ ფაქტორების გათვალისწინებითაც, ფულადი გზავნილების გაუმჯობესება სახეზეა, თუმცა არა ისეთი სწრაფი ტემპით, როგორც შეიძლება სტატისტიკიდან ჩანდეს. აღნიშნული დადებითი დინამიკა მნიშვნელოვანია, რამდენადაც ის სავალუტო ბაზარზე უცხოური ვალუტის მიწოდებას ზრდის და, საბოლოო ჯამში, უფრო დაბალი მიმდინარე ანგარიშის დეფიციტს განაპირობებს“, - განმარტავს კობა გვენეტაძე.

აღსანიშნავია, რომ 2020 წლის ივლისში საქართველოდან საზღვარგარეთ 22.2 მლნ აშშ დოლარი (68.1 მლნ ლარი) გადაიგზავნა, რაც 2019 წლის ივლისის (19.2 მლნ აშშ დოლარი) ანალოგიურ მაჩვენებელთან შედარებით 15.6%-ით მეტია.

ანი ცარციძე