ნიუტონის თავისუფალი სკოლა ახალ კომპლექსს პოლიტკოვსკაიას ქუჩაზე აშენებს, სკოლის კომპლექსი  18,765 მ 2 მიწის ნაკვეთზე განლაგდება და სასწავლო შენობას, ორ ღია მოედანს, დახურულ სპორტულ დარბაზს, საცურაო აუზსა და რეკრეაციული ზონებს მოიცავს.

როგორც „კომერსანტთან“ ნიუტონის თავისუფალი სკოლის  მარკეტინგის და ციფრული არხების მენეჯერმა ლუკა ზედაშიძემ აღნიშნა,  შენობა გამოირჩევა თანამედროვე დიზაინით, ფუნქციონალითა და უსაფრთხოების სისტემებით. 

„აღსანიშნავია, რომ ნიუტონის ახალ სკოლას ექნება უსაფრთხოების განსაკუთრებული ზომები, რომლის ანალოგებიც არ გვხვდება სხვა საგანმანათლებლო დაწესებულებებში. ტერიტორია აერთიანებს ღია და დახურულ სპორტული მოედნებს, აუზს, ღია ტიპის აუდიტორიებს, სასწავლო ლაბორატორიებს, რეკრეაციულ ზონებს, ტყე-პარკს“ -  აღნიშნავს ლუკა ზედაშიძე.

 ახალი ინფრასტრუქტურის მოწყობის საინვესტიციო ღირებულება 15 მილიონ ლარს აღემატება. სკოლის კომპლექსის მშენებლობა წლის ბოლოსთვის დასრულდება და 1600 მოსწავლეზე იქნება გათლილი.

„ჩვენ უკვე ვთავაზობთ ჩვენს მოსწავლეებს მსოფლიოში ერთ-ერთ ყველაზე პოპულარულ და პრესტიჟულ საერთაშორისო - IB პროგრამის სამივე საფეხურს“ - განმარტავს ლუკა ზედაშიძე.

ამჟამად ნიუტონის თავისუფალი სკოლა ნუცუბიძის ფერდობზე მდებარეობს, თუმცა აღნიშნული შენობა სკოლის საკუთრებაში არ არის.

ნიუტონის  თავისუფალი სკოლა  სამომავლოდ რამდენიმე ფილიალის დამატებასაც გეგმავს.

თაკო კვაჭანტირაძე