კორონა-კრიზისი მსოფლიოს უმსხვილეს პორტებს პრაქტიკულად არ შეხებიათ. მათი ტვირთბრუნვა პირიქით გაიზარდა. ჩინეთში მდებარე ნინგო-ზოუშენის პორტი გასულ წელს 4.7%-ით მეტ 1.17 მლრდ ტონა ტვირთს მოემსახურა.

1.17 მლრდ ტონა ჩინეთის მასშტაბებისთვისაც კი ძალიან დიდია. შედარებისთვის ანაკლიის პორტი, ბოლო მე-9 ფაზაზე 100 მლნ ტონას უნდა მომსახურებოდა. 2019 წელს ქართული პორტების ჯამურმა ტვირთბრუნვამ 17.2 მლნ ტონა, ანუ ერთ ჩინურ პორტთან შედარებით 68-ჯერ ნაკლები შეადგინა. მსოფლიო პორტებისგან განსხვავებით 2020 წელს ქართულ პორტებში ტვირთბრუნბვა 2%-ით შემცირდა.

ნინგო-ზოუშენი მართალია ტონაჟით პირველია, მაგრამ არა მიღებული კონტეინერებით. ამ მხრივ შანხაის პორტი ლიდერობს, რომელმაც 2020 წელს 43.5 მლნ კონტეინერი გადაამუშავა. 0.2 მლნ-ით მეტი ვიდრე 2019 წელს, მაშინ როცა ნინგო-ზოუშენი მხოლოდ 28.7 მლნ კონტეინერს მოემსახურა. ამავე დროს შანხაის პორტის დატვირთა ტონაჟის მიხედვით ნინგო-ზოუშენთან შედარებით ნახევარზე ნაკლები იყო და 544 მლნ ტონა შეადგინა. გასული წლის 11 თვეში ქართულმა პორტებმა მხოლოდ 454 ათასი კონტეინერის მომსახურება შეძლეს, 23%-ით ნაკლების ვიდრე 2019 წლის იანვარ-ნოემბერში.

საკონტეინერო გადაზიდვების მიხედვით 10 უდიდესი პორტიდან 7 ჩინურია და არც ერთი ევროპული ან ამერიკული. დარჩენილ სამ ადგილს სინგაპურის, კორეისა და საამიროების პორტები ინაწილებენ.

სიტუაცია დაახლოებით იგივენაირია ტონაჟის მიხედვითაც სადაც 10-დან 7 პორტი ასევე ჩინურია, დარჩენილი სამიდან კი ერთი ისევ სინგაპურის პორტია, ერთი ავსტრალიის და ერთიც მეათე ადგილზე მყოფი როტერდამის პორტი. 

უმსხვილესი პორტებისგან განსხვავებთ კოვიდრეგულაციების მიზეზით 2020 წელს მსოფლიო აეროპორტებში მგზავრთნაკადი 60%-ით 4.543 მლრდ-დან 1.795 მლრდ-მდე შემცირდა, საქართველოს აეროპორტებში კი 84%-ით 5.2 მლნ-დან 833 ათასამდე.

გიორგი ელიზბარაშვილი