„ნიკორა“ - საქართველოში სასურსათო მაღაზიების რაოდენობის მიხედვით ყველაზე მსხვილი ქსელია.
ბოლო 10 წლის მანძილზე მისი ბრენდის ქვეშ მომუშავე მაღაზიების რაოდენობა 5-ჯერ გაიზარდა და 330-ს მიაღწია, როგორც თბილისში, ასევე რეგიონებში.
საიტი EastFruit „ნიკორა ტრეიდის“ დირექტორს დავით ურუშაძეს გასული წლის შედეგებზე და სამომავლო გეგმებზე გაესაუბრა.
რა გავლენა მოახდინა პანდემიამ ზოგადად ქსელურ ვაჭრობაზე და კერძოდ „ნიკორაზე“?
კორონავირუსთან დაკავშირებულმა ცვლილებებმა ქართულ ეკონომიკაზე ძალიან მძიმე გავლენა მოახდინეს. ყველაზე მეტად ტურისტული სექტორი დაზარალდა, და მასთან ერთად - ყველა სუბიექტი, რომელიც ტურიზმთან პირდაპირ ან ირიბად დაკავშირებული იყო. ასე რომ, შემოსავლის გარეშე ეკონომიკის 20% დარჩა.
ეს ჯერ არაა დასასრული - საკარანტინო შეზღუდვები დღესაც მოქმედებს, და ბევრი ეკონომიკური სუბიექტი ნორმალურად მუშაობას კვლავ ვერ ახერხებს.
სურსათით ვაჭრობა - ერთ-ერთი სექტორია, რომელიც მუშაობას აგრძელებს, თუმცა, რეგულაციები ჩვენც დიდ პრობლემებს გვიქმნიან. უსაფრთხოების დაცვის მიზნით ჩვენ გარკვეული ზომების მიღება გვიწევს, რაც სერიოზულ ხარჯებთანაა დაკავშირებული. გარდა ამისა, გაყიდვებზე ზოგადი ეკონომიკური კრიზისი, მოსახლეობის შემოსავლების ვარდნა, და საზოგადოებრივი ტრანსპორტის გაჩერებაც მოქმედებს.
შედეგად ჩვენი გაყიდვები 5%-ით შემცირდა, რაც მნიშვნელოვანი კლებაა ისეთი მსხვილი კომპანიისთვის, როგორც „ნიკორა“.
თუმცა, სირთულეების მიუხედავად, 2020 წელს ჩვენ არც ერთი სამუშაო ადგილი არ შევამცირეთ, და მეტიც, 58 ახალი მაღაზია გავხსენით, სადაც 700-მდე ადამიანი დასაქმდა.
ამაში სახელმწიფოს დამსახურებაც არის - მთავრობის მიერ დაწესებული საგადასახადო შეღავათების წყალობით, ჩვენ თანამშრომლების შენარჩუნება მოვახერხეთ, და ხელფასებს მაშინაც კი ვუხდიდით, როდესაც ისინი სამსახურში ვერ დადიოდნენ.
როგორ შეიცვალა მოსახლეობის სამომხმარებლო ქცევა და პრიორიტეტები?
თანამედროვე ქართული რითეილი ძალიან სწრაფად, საშუალოდ 28-30%-ით იზრდება, და ტრადიციულ რითეილს, ანუ, მცირე არაბრენდულ მაღაზიებს, ნელა-ნელა ანაცვლებს. ეს ტენდენცია არა მხოლოდ დიდი ქალაქებისთვის, არამდე რეგიონებისთვის, და სოფლებისთვისაც კი აქტუალურია. ეკონომიკური კრიზისის მიუხედავად, ჩვენი ქსელის მყიდველთა რაოდენობა გაიზარდა.
რაც შეეხება ცვლილებებს - მაგალითად, პანდემია მზა კერძების და პროდუქტების გაყიდვებზე ძალიან ნეგატიურად აისახა. ეს სეგმენტი ძირითადად სამსახურებში დასაქმებულ ადამიანებზე იყო გათვლილი, დღეს კი სულ უფრო მეტი ადამიანი ან საერთოდ უმუშევარია, ან სახლიდან მუშაობს.
შესაბამისად, ისინი საჭმელს თავად იმზადებენ, და მზა კერძებს ნაკლებად ყიდულობენ.
თუმცა, დადებითი ცვლილებებიც არის - მაგალითად, ხილ-ბოსტნეული, რომელსაც ადრე ძირითადად ბაზრებში ყიდულობდნენ, დღეს ქსელებში უფრო მეტად ყიდულობენ.
თანაც, საზოგადოებრივი ტრანსპორტის გაჩერების პირობებში „ნიკორა“, რომლის მაღაზიებიც ძირითადად მჭიდროდ დასახლებულ უბნებში მდებარეობს, ძალიან მოხერხებული ფორმატია.
სავარაუდოდ, ჩვენ მომხმარებლებს ხილ-ბოსტნეულის მაღაზიაში ყიდვის ჩვევა უკვე ჩამოუყალიბდათ და ეს ტენდენცია კარანტინის მოხსნის შემდეგაც გაგრძელდება. ჩვენ მაღალი ხარისხის შენარჩუნებას ვცდილობთ, ფასები კი ბაზრების დონეზეა.
კიდევ ერთი მნიშვნელოვანი ცვლილება - კრიზისმა მსყიდველობითუნარიანობა მკვეთრად შეამცირა, და დღეს პრიორიტეტია - პირველი აუცილებლობის საქონელი. ამავე დროს ადამიანები მაღაზიაში უფრო იშვიათად დადიან, სამაგიეროდ, გაცილებით მეტს ყიდულობენ.
რას მოელით 2021 წლისგან?
ჩვენს ბაზარზე კონკურენცია ძალიან მაღალია. ყველა მოთამაშე სწრაფად ზრდას და ქალაქებშიც და რეგიონებში რაც შეიძლება უკეთესი ადგილების დაკავებას ცდილობს. ბრძოლა ყველა მიმართულებით მიმდინარეობს, და კრიზისის მიუხედავად, ქსელური ვაჭრობა 2020 წელს 30%-ით გაიზარდა.
ჩვენც დინამიურად ვიზრდებით, და გეგმების მიხედვით, „ნიკორას“ ქსელის ბრუნვა 30%-ით, 80 ახალი მაღაზიის ხარჯზეა გაიზრდება.
Eastfruit.com
მოამზადა თენგიზ აბლოთიამ