ვცდილობთ საექსპორტო ბაზრების დივერსიფიცირებას და გეოგრაფიული არეალის გაფართოებას, მაგრამ არ ვცდილობთ საექსპორტო პორტფელის დივერსიფიცირებას. საექსპორტო პორტფელში ტრადიციულის გვერდით ისეთი პროდუქტიც უნდა დაინერგოს, რაც მსოფლიოში ხუთი-ათი წლის მანძილზე ტრენდი იქნება, – ამის შესახებ კომპანია „ნატახტარის“ კორპორატიულმა დირექტორმა, ნიკოლოზ ხუნძაკიშვილმა დღეს საქართველოს პირველი არხის გადაცემა „ბიზნესპარტნიორში“ განაცხადა.

გადაცემაში საქართველოში არსებული ბიზნესგარემო და ევროკავშირთან ასოცირების ფარგლებში დასანერგი რეგულაციები განიხილეს. დისკუსიის დროს აღინიშნა, რომ რეგულაციების მიღება მცირე და საშუალო ბიზნესს ტვირთად არ უნდა დააწვეს, რადგან მათ ფინანსურ რესურსზე ხელი ნაკლებად მიუწვდებათ. 

ხუნძაკიშვილის მოსაზრებით, ფინანსური რესურსის გარდა ადგილობრივ ბიზნესს მეტი განათლება და ახალი ტენდენციების ათვისებაც სჭირდება, რათა ქვეყნიდან მაღალი ინტელექტის მქონე სამუშაო ძალის გადინება არ მოხდეს.

„ჩვენ ვცდილობთ საექსპორტო ბაზრების გეოგრაფიული არეალის დივერსიფიცირებას, მაგრამ სამწუხაროდ, არ ვცდილობთ საექსპორტო პორტფელის დივერსიფიცირებას. აქედან გამომდინარე, ჩვენთვის მნიშვნელოვანია, რომ განსხვავებული მიდგომები გვქონდეს და ტრადიციულ პროდუქტებთან ერთად [როგორც საქონელი, ასევე მომსახურება], მათ შორის ტურისტულიც, რომელიც ექსპორტად შეიძლება ჩაითვალოს, ის ტრენდიც შემოვიღოთ, რაც მსოფლიოში მომავალი ხუთი-ათი წლის მანძილზე მოთხოვნადი იქნება. შესაბამისად, ჩვენი ინტელექტუალური პოტენციალიც სხვა მხრივ მივმართოთ და სხვა საექსპორტო პროდუქტები შევქმნათ. მაგალითად, ყველაზე მნიშვნელოვანი კომპონენტი ეს არის საინფორმაციო და სატელეკომუნიკაციო ტექნოლოგიები, რომელსაც საზღვრები არ აქვს და დისტანციური მუშაობა შეიძლება. ვგულისხმობ არა როგორც აუთსორსინგის სერვისის მიწოდებას, არამედ ტექნოლოგიების მიმწოდებელი რომ გავხდეთ. ამის შესაძლებლობა საქართველოს აქვს. გვყავს ხალხი, ვინც მათემატიკისა და კომპიუტერული მეცნიერებების ფაკულტეტებს ამთავრებს და საუკეთესო ახალგაზრდები ერთი რომ ქვეყნიდან მიდიან, მეორე – სხვა ქვეყნის ეკონომიკის ზრდას ემსახურებიან და მესამე – ისეთ სისტემებში საქმდებიან, რომელიც მათ განვითარების საშუალებას არ აძლევს და რუტინულ სამუშაოს ასრულებენ. განათლებას ალტერნატივა არ აქვს. ეს იქნება დუალური განათლება, პროფესიული სასწავლებლები თუ სხვა. ჩვენ გვჭირდება ის ხალხი, რომელიც ჩვენს ეკოსისტემაში ჩაებმება. ეს მხოლოდ ბიზნესთან და საგანმანათლებლო დაწესებულებებთან თანამშრომლობით არის შესაძლებელი“, – განუცხადა ნიკოლოზ ხუნძაკიშვილმა „ბიზნესპარტნიორს“.

1tv.ge