„ეს არის კრიზისული პერიოდის დროს სამართავი გეგმა და არა პოსტკრიზისული, შესაბამისად არსებული რესურსების გათვალისწინებით და მიღებული შედეგებით, პრემიერის მიერ წარდგენილი გეგმა ყველაზე ოპტიმალური ვარიანტია, როგორც სოციალური ასევე ეკონომიკური მიმართულებით“, - ასე აფასებს „ნატახტარის“ კორპორატიულ საქმეთა დირექტორი ნიკოლოზ ხუნძაკიშვილი საქართველოს პრემიერ-მინისტრის გიორგი გახარიას მიერ წარდგენილ ეკონომიკურ გეგმას.

„ბიუჯეტს როდესაც შემოსავლები აკლდება, ეს ყველაზე ოპტიმალურია ვარიანტია რაც ამ ეტაპზე შეიძლებოდა გვქონოდა. დღეს პრემიერმა განაცხადა, რომ 3 მლრდ ლარიანი დახმარების პაკეტი ყველა ინდუსტრიისთვის იქნება გათვლილი, მათ შორის ხელფასების სუბსიდირებაზე, რაც შეღავათს მისცემს მცირე და საშუალო ბიზნესს, მსხვილ კომპანიებში მაღალი ხელფასებია და შესაბამისად ეს მათზე არ ვრცელდება. ასევე საუბარია დღგ-ს დაბრუნებაზე, რომელიც შეღავათს მისცემს კომპანიებს იმისთვის, რომ საბრუნავი საშუალების აკუმულირება მოახდინონ. ეს რაც შეეხება ბიზნესის ნაწილს, გარდა ამისა მინდა ვთქვა, რომ გადაადგილების ნაწილის მიმართ სწორი მიდგომაა და რაც მთავარია ჩვენ გვაქვს 6 კვირიანი გეგმა, იმ შემთხვევაში თუ რაიმე არ შეიცვლება და შეგვიძლია სწორად დავგეგმოთ ბიზნესი და განვსაზღვროთ როდის რა გავხსნათ. კიდევ ერთხელ ავღნიშნავ, რომ ეს არის რესურსების გათვალისწინებით ოპტიმალური გეგმა“, - განმარტავს ნიკოლოზ ხუნძაკიშვილი.

შეგახსენებთ, რომ დღეს პრემიერ მინისტრმა ეკონომიკის გეგმა წარადგინა, რომლის მიხედვითაც კრიზისული მენეჯმენტისთვის ქვეყანა 3 მლრდ 500 მლნ ლარს დახარჯავს. აღნიშნულიდან მოქალაქეზე ზრუნვასა და მათ სოციალურ დახმარებაზე დაიხარჯება 1 მლრდ 35 მლნ ლარი, ეკონომიკაზე ზრუნვასა და მეწარმეობის მხარდაჭერაზე 2 მლრდ 110 მლნ ლარი, ხოლო ჯანდაცვის სისტემის გაძლიერებასა და პანდემიასთან ბრძოლაში 350 მლნ ლარი.

ნინო თამაზაშვილი