ექსპერტმა ეკონომიკის საკითხებში ნიკოლოზ მჭედლიშვილმა გადაცემა „არენას“ ეთერში საქართველოს ეკონომიკაზე კორონავირუსის გავლენაზე ისაუბრა. ექსპერტის აზრით, ამ საკითხს ხანმოკლე და გრძელვადიან პერსპექტივაში უნდა შევხედოთ.
„ჩვენ დღეს, გამომდინარე იქიდან, რომ გლობალური ეკონომიკის ნაწილი ვართ, რაც კარგიც და ცუდით არის, უკვე ვკარგავთ შემოსავალს. ვკარგავთ ჩინეთიდან, იმიტომ რომ ჩინეთთან პირდაპირი საჰაერო მიმოსვლა არ გვაქვს, ცხადია, ჩვენ იქიდან გვყავდა ტურისტები, ეს პირდაპირი ზეგავლენა რაც არის. გარდა ამისა, ჩინეთთან გვაქვს ვაჭრობა, ექსპორტი გვაქვს. შარშანდელი ციფრები რომ ვნახოთ ღვინო, ექსპორტი და ტურიზმი რომ შევაჯამოთ, დაახლოებით 300 მილიონი დოლარის შემოსავალი მივიღეთ ჩინეთიდან. წარმოიდგინეთ, ეს კრიზისი რომ გაგრძელდეს ჩინეთი, ანუ ჩინეთის ეკონომიკა კიდევ უფრო რომ დაეცეს, ვიდრე მოსალოდნელი იყო, მაშინ ცხადია, რომ ჩვენ იმდენს ვერ გავყიდით და ეს არის ჩვენი ზარალი. მეორე მთავარი მიმართულება არის ირანი, რომელთანაც ჩვენ გვქონდა შარშანდელი ციფრები რომ მოვიშველიოთ ისევ, 177 მილიონი. ეს არის ტურიზმი და სასაქონლო ექსპორტი. აქედანაც ჩვენ უკვე ვკარგავთ, იმიტომ რომ სახმელეთო საზღვარი ჩაკეტილია და საჰაერო მიმოსვლაც არის ჩაკეტილი. შესაბამისად, ჩვენ გვაქვს ცუდი ამბები აქედან“, - განაცხადა ექსპერტმა.
თუმცა მჭედლიშვილი აღნიშნავს, რომ გრძელვადიან პერსპექტივაში კორონავირუსმა შესაძლოა საქართველოს სარგებელიც მოუტანოს.
„დღეს უკვე ლაპარაკობენ ამერიკული კომპანიები, რომ ჩინეთიდან გამოიტანონ წარმოება და წაიღონ თავის ქვეყანაში ან, მაგალითად, სხვა ქვეყნებში. ერთ-ერთ ყველაზე პოპულარული მიმართულება მექსიკაა, იმიტომ რომ მეზობელია. მე ვფიქრობ, რომ გრძელვადიან პერსპექტივაში ჩვენ კარგად თუ მოვიქცევით და ჭკვიანურად თუ მოვიქცევით, შესაძლოა ეს ტრენდიც გამოვიყენოთ“, - აღნიშნა მჭედლიშვილმა.
საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე კი 29 თებერვალს დადასტურდა.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.
imedinews.ge