ნიკოლოზ ბასილაშვილს გირაოს გადახდის ვადად 30 დღე განესაზღვრა. ამის შესახებ პროკურორმა ნათია გურულმა ჟურნალისტებს სასამართლო სხდომის დასრულების შემდეგ განუცხადა.
მისი განმარტებით, არასრულწლოვნის ინტერესებიდან გამომდინარე ბრალდების მხარე მტკიცებულებების შინაარსობრივ კლვევაში ამ ეტაპზე ვერ შევა.
ნათია გურული ადასტურებს, რომ შემაკავებელი ორდერი ნიკოლოზ ბასილაშვილის მამასაც აქვს გამოწერილი, თუმცა ძალადობის შესახებ დაზარალებულიც არ მიუთითებს.
„ბრალდების მხარემ წარადგინა მტკიცებულებათა ერთიანობა და ამის საფუძველზე ითხოვდა პატიმრობას. სასამართლომ ნაწილობრივ გაიზიარა ბრალდების მხარის მოთხოვნა, თუმცა სასამართლო არ დაგვეთანხმა იმ გარემოებაში, რომ არსებობდა მაღალი რისკები, ჩადენილიყო ახალი დანაშაული, ასევე, განადგურებულიყო მტკიცებულება, ან მიმალულიყო ნიკოლოზ ბასილაშვილი. თუმცა, ეს არც ერთ შემთხვევაში უნდა იყოს გაგებული ისე, რომ სასამართლომ ჩათვალა, მტკიცებულებები არ არსებობდა“, - განაცხადა პროკურორმა.
თბილისის საქალაქო სასამართლომ ყოფილი მეუღლის ცემის ბრალდებით დაკავებულ ჩოგბურთელ ნიკოლოზ ბასილაშვილს აღკვეთის ღონისძიების სახით 100 000-ლარიანი გირაო შეუფარდა.
პროკურატურა ჩოგბურთელისთვის აღკვეთის სახით პატიმრობას ითხოვდა.
საქართველოს პროკურატურამ ყოფილი მეუღლის მიმართ განხორციელებული ძალადობის ფაქტზე ბასილაშვილს ბრალდება სისხლის სამართლის კოდექსის 126-ე პრიმა მუხლის მე-2 ნაწილის „ბ“ ქვეპუნქტით წარუდგინა, რაც არასრულწლოვნის თანდასწრებით მისივე ოჯახის წევრის მიმართ ძალადობას გულისხმობს. წინასასამართლო სხდომა 16 ივლისს არის ჩანიშნული.
Imedinews